Tramp Qarabağdan üz döndərdi - SƏBƏB

Eks-prezident Reyqanın müşaviri bunun səbəblərini Bakıda açıqladı

ABŞ-ın yeni prezident administrasiyası təxminən iki il Dağlıq Qarabağ münaqişəsinin sülh yolu ilə nizamlanması prosesinə məhəl qoymayacaq.

Bunu ABŞ dövlət departamenti və Pentaqonun siyasi şərhçisi, Strateji və beynəlxalq araşdırmalar mərkəzinin baş müşaviri, eks-prezident Ronald Reyqanın müşaviri olmuş Edvard Lyuttvak Bakıda "Vestnika Kavkaza" saytına bildirib.

Onun sözlərinə görə, ABŞ hətta diplomatik səviyyədə münaqişəyə müdaxilə etməyəcək. Çünki ABŞ-ın yeni administrasiyası hazırlıq görmür.

"Yeni administrasiyanın çox problemləri var. Başı buna qarışıb. Vaşinqton Dağlıq Qarabağ münaqişəsi ilə bağlı ciddi niyyətləri olmadan nizamlanma prosesinə müdaxiləyə risk etmir. Ona görə də ABŞ-ın münaqişənin həllində iştirakı gecikəcək, daha doğrusu fəal iştirak etməyəcək. Ən yaxşısı, sülh prosesini rədd etmək deyil, müəyyən müddətə təxirə salmaqdır", - Edvard Lyuttvak bildirib.

Edvard Lyuttvak
Eks-müşavir eyni zamanda bildirib ki, dünyanın heç bir nəhəng dövləti Dağlıq Qarabağ münaqişəsinin sülh yolu ilə nizamlanması prosesinə bu gün ciddi səy göstərmir.

"ABŞ-ın Cənubi Qafqaz üzrə mövqeyinin dəyişikliyi hələlik tam aydın deyil. Azərbaycan beynəlxaq birliyin təqdir edilən üzvlərindəndir, mütərəqqi siyasət yürüdür. ABŞ-ın xarici siyasətində Azərbaycanla bağlı dəyişiklik yoxdur. Bizim münasibətimiz belədir: Əgər Ermənistanla münaqişə həllini tapsa, hər şey möhtəşəm olacaq. Görünən odur ki, Azərbaycan bu istiqamətdə fəal siyasət yürüdən tərəfdir", - deyə siyasi şərhçi bildirib.

Mənbə: publika.az

Telegramda izləyin

instagramda izləyin