"Bu gün Bakı 100 ildən sonra yenidən türkologiyanın gələcəyini müəyyənləşdirir" - DEPUTAT

Birinci Türkoloji Qurultayın 100 illiyi ilə bağlı Bakıda bu çərçivədə "Türk Dünyası Həftəsi" keçirilir. 20 ölkədən 215-dən artıq qonaq elm və mədəniyyətlə bağlı silsilə tədbirlərdə iştirak edir və dünyaya önəmli mesajlar ünvanlayırlar. Ona görə də Birinci Türkoloji Qurultayını sadəcə elmi toplantı deyil, həm də türk dünyasının intellektual birliyinin təməlini qoyan tarixi dönüş nöqtəsi kimi də qiymətləndirmək olar.

Tədbir Prezident İlham Əliyevin "Birinci Türkoloji Qurultayın 100 illik yubileyinin keçirilməsi haqqında" 22 oktyabr 2025-ci il tarixli Sərəncamına uyğun olaraq reallaşdı. Sənəddə də vurğulandığı kimi, Birinci Türkoloji Qurultay ortaq zəngin keçmişə və qədim irsə malik türk xalqlarının mədəni inteqrasiyasında mərhələ yaratmış müstəsna əhəmiyyətli hadisələrdəndir.Ölkəmizin beynəlxalq tədbirlərə ev sahibliyi etməsi, Türk dövlətləri arasında əməkdaşlığın genişlənməsinə verdiyi töhfə və ortaq mədəni irsin qorunması istiqamətində həyata keçirdiyi layihələr bunu bir daha təsdiq edir.

Birinci Türkoloji Qurultayın əhəmiyyəti olduqca böyükdür. Çünki Qurultay ilk dəfə olaraq müxtəlif türk xalqlarını vahid elmi platformada birləşdirir. Keçirilən tədbirlərdə Türkologiyanın əsas problemləri sistemli şəkildə müzakirə edildi. Bu baxımdan qurultay elmi istiqamətləri müəyyənləşdirdi və gələcək tədqiqatlar üçün baza yaratdı.

Hər zaman olduğu kimi bu prosesdə də Azərbaycan fəal rol oynayır. Qurultayın Bakıda keçirilməsi və əlifba islahatının burada başlaması Azərbaycanın regional lider və intellektual mərkəz rolunu gücləndirir. Bu gün qurultayın ideyaları yenidən həyata keçirilir, türk dövlətləri arasında əməkdaşlıq güclənir, ortaq mədəni və dil siyasəti aktuallaşır. Bir sözlə bu gün Bakı 100 ildən sonra yenidən türkologiyanın gələcəyini müəyyənləşdirir.

Türk xalqlarının təkamülü və bu günümüzədək, birləşmək uğrunda keçdiyi məşəqqətli yolu əks etdirən tarixi və elmi faktların yer aldığı vahid ensiklopediyanın yaradılması da qiymətli bir əsər olar. Həmçinin, TDT üzv ölkələrinin alimlərinin birgə işi kimi ərsəyə gələ bilər.

TDT artıq geosiyasi, geoiqtisadi vahid platforma rolunu təsdiqləyib. Bu çərçivədə yumşaq güc diplomatiyasının da gücləndirilməsi, müxtəlif elmi platformaların yaradılması və ortaq tarixi keçmişin, dilin, dəyərlərin, irsin qorunması, təbliği və inkişafı xalqlararası əməkdaşlığa mühüm töhfə verir.

Cənab prezident İlham Əliyevin Türk dünyasının birliyi, həmrəyliyi istiqamətində atdığı addımlar davamlılığı ilə diqqət mərkəzindədir. Türk dövlətlərini bir araya gətirən Türk Dövlətləri Təşkilatı, sadəcə, əməkdaşlıq platforması deyil, ciddi geosiyasi mərkəzlərdən biri kimi formalaşır.

"Türk Dünyası Həftəsi" də göstərir ki, ortaq tarix yalnız keçmişi öyrənməklə yanaşı həm də gələcəyin qurulması üçün də mühüm əsasdır. Bu platforma Türk dövlətləri arasında qarşılıqlı etimadı gücləndirir, ortaq layihələrin sayını artırır və gələcək nəsillərin ortaq kimlik şüurunun formalaşmasına xidmət edir. Azərbaycan son illərdə Türk dünyasında inteqrasiya proseslərinin əsas təşəbbüskarlarından biri kimi çıxış edir.

Cavanşir Paşazadə
Milli Məclisin deputatı

Telegramda izləyin