"Birinci Türkoloji Qurultay sübut etdi ki, müasir beynəlxalq münasibətlər yalnız iqtisadi imkanlar üzərində qurulmur" - DEPUTAT

"Bakıda Birinci Türkoloji Qurultayın 100 illiyinə həsr olunmuş "Türk Dünyası Həftəsi"nin keçirilməsi türk dövlətləri arasında əməkdaşlığın növbəti inkişaf mərhələsinin məhz humanitar inteqrasiya üzərində qurulacağını göstərir".

Bunu Sonxeber.az -a danışan deputat Tamam Cəfərova deyib.

Deputat qeyd edib ki, bu qurultay bir daha sübut etdi ki, müasir beynəlxalq münasibətlər yalnız enerji ehtiyatları, nəqliyyat dəhlizləri və iqtisadi imkanlar üzərində qurulmur:

"Dövlətlərin beynəlxalq nüfuzu getdikcə daha çox onların intellektual potensialı, elmi əməkdaşlıq imkanları, təhsil sistemi, mədəni diplomatiyası və ümumi humanitar məkan formalaşdırmaq qabiliyyəti ilə bağlıdır. Bu baxımdan təsadüfi deyil ki, Türk dünyasının gələcəyinə dair müzakirələr yenidən məhz Bakıda aparılması təsadüfü deyil. 1926-cı ildə keçirilən Birinci Türkoloji Qurultay da Bakıda keçirilmişdi. Əlbəttə ki, öz dövrü üçün bu misilsiz elmi hadisə idi.
Həmin dövrdə ilk dəfə olaraq müxtəlif türk xalqlarının nümayəndələri eyni platformada toplaşaraq dilçilik, əlifba, terminologiya, təhsil və elmin inkişafı kimi fundamental məsələləri müzakirə ediblər.Lakin həmin dövrdə irəli sürülən bir çox ideyaların həyata keçirilməsi sonrakı siyasi proseslər səbəbindən mümkün olmadı. Sovet dövrünün totalitar idarəçiliyi, repressiyaları və ideoloji məhdudiyyətləri uzun illər türk xalqları arasında təbii elmi və humanitar əməkdaşlıq imkanlarını məhdudlaşdırdı. 100 il sonra yenidən bu qurultayın Bakıda keçirilməsi ortaq tarixi yaddaşı gələcəyə yönəlmiş inkişaf resursuna çevirən müasir türk inteqrasiya modelinin formalaşmasında Azərbaycanın mühüm rol oynadığını sübut edir".

Deputat vurğulayıb ki, tədbir çərçivəsində iştirakçılar Azərbaycanın zəngin tarixi irsi, memarlıq abidələri, ədəbiyyat və incəsənət nümunələri, eləcə də ölkənin müasir inkişaf dinamikası ilə yaxından tanış olmaq imkanı əldə edirlər:

"Bu da özlüyündə Azərbaycanın Türk dünyası daxilində daha dərindən anlaşılmasına və müxtəlif ölkələr arasında qarşılıqlı baxışların zənginləşməsinə xidmət edir. Ümumiyyətlə, son illərdə Türk Dövlətləri Təşkilatının beynəlxalq nüfuzunun artması, yeni əməkdaşlıq mexanizmlərinin formalaşdırılması və türk dövlətləri arasında qarşılıqlı əlaqələrin möhkəmlənməsində Prezident İlham Əliyevin xüsusi rolu var. Birinci Türkoloji Qurultayın 100 illiyinin keçirilməsi də Prezident İlham Əliyevin Türk dünyasının gələcəyinə hesablanmış növbəti təşəbbüsüdur. Bu gün Azərbaycan Prezident İlham Əliyevin apardığı müdrik beynəlxalq siyasəti ilə Türk dünyasının siyasi, iqtisadi, mədəni və humanitar inteqrasiyasının əsas hərəkətverici qüvvələrindən birinə çevrilib. Birinci Türkoloji Qurultayın 100 illiyinə həsr olunmuş "Türk Dünyası Həftəsi"nin məhz Bakıda keçirilməsi bunu bir daha sübut edir".

Telegramda izləyin