"Bu gün Avropa İttifaqının Cənubi Qafqaz regionunda əsas iqtisadi və ticarət tərəfdaşı Azərbaycandır" - DEPUTAT

"Prezident İlham Əliyevin Avropa Komissiyasının Prezidenti Ursula Fon der Lyayen ilə mətbuata bəyanatı zamanı səsləndirdiyi fikirlər Azərbaycan-Avropa İttifaqı (Aİ) münasibətləri keyfiyyətcə yeni inkişaf mərhələsinə qədəm qoyur".

Bunu Sonxeber.az-a danışan Vüqar İskəndərov bildirib.

Deputat qeyd edib ki, ölkə başçısının söylədiyi kimi müşahidə olunan yeni dinamika bütün tərəflər üçün mühüm imkanlar yaradacaq. Tərəflər yaranmış imkanlardan səmərəli istifadə edilməlidir:

"Son aylarda Avropa İttifaqının yüksəksəviyyəli rəsmilərinin Azərbaycana ardıcıl səfərlər və səsləndirilən fikirlər Azərbaycan-Avropa İttifaqı (Aİ) münasibətlərin müsbət istiqamətdə inkişafının sübut edir. Əvvəlcə Avropa İttifaqı Şurasının Prezidenti Antonio Koşta, daha sonra Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas, ardınca isə Avropa Komissiyasının Prezidenti Ursula Fon der Lyayenin Bakıya səfəri tərəflər arasında əməkdaşlığın dərinləşdirilməsi istiqamətində qarşılıqlı siyasi iradənin mövcudluğunu sübut edir.

Bu gün Avropa İttifaqının Cənubi Qafqaz regionunda əsas iqtisadi və ticarət tərəfdaşı Azərbaycandır. Xarici ticarət dövriyyəmizin təxminən 40 faizi Avropa İttifaqının payına düşür. Eyni zamanda, Avropa İttifaqının Cənubi Qafqaz ölkələri ilə ümumi ticarət dövriyyəsində isə Azərbaycanın payı təxminən 70 faizdir. Bu göstəricilər Azərbaycanın Avropa üçün etibarlı və strateji tərəfdaş olduğunu bir daha təsdiqləyir".

Deputat söyləyib ki, Azərbaycan-Avropa İttifaqı əməkdaşlığında xüsusi yeri enerji təhlükəsizliyi tutur:
" Bilirsiniz ki, 4 il öncə Ursula Fon der Lyayenin ölkəmizə səfəri zamanı Azərbaycan ilə Avropa İttifaqı arasında enerji sahəsində Strateji Tərəfdaşlığa dair Anlaşma Memorandumu imzalandı. Bu memorandum enerji təhlükəsizliyi ilə bağlı əməkdaşlıqda yeni mərhələnin əsasını qoydu. Xüsusilə də Avropanın enerji təhlükəsizliyinin möhkəmləndirilməsində Azərbaycanın rolu daha da artdı.

O sənəd imzalandıqdan sonra Avropaya qaz ixracının həcmi təxminən 65 faiz artıb. Bu gün Azərbaycan təbii qazı Avropa İttifaqına üzv olan 10 ölkəyə ixrac edilir. Əlbəttə ki bu da Azərbaycanın enerji sahəsində üzərinə götürdüyü öhdəlikləri yüksək səviyyədə yerinə yetirdiyinin sübutu ilə yanaşı həm də etibarlı təchizatçı olduğunun göstəricisidir. Bundan əlavə Azərbaycan yaşıl enerji sahəsində də böyük hədəflər müəyyənləşdirib. Qarşıdakı illərdə ölkəmizdə yaşıl enerji istehsalı gücünün 8 giqavata çatdırılması planlaşdırılır. Bu potensial həm Avropa bazarına yaşıl enerjinin ixracına, həm də daxili istehlakda təbii qazdan istifadənin azalmasına imkan verəcək".

Deputat vurğulayıb ki, Ursula Fon der Lyayenin Bakıya səfəri zamanı nəqliyyat və bağlantı layihələri də xüsusi diqqət mərkəzində oldu.

"Avropa Komissiyasının Prezidenti çıxışında Avropa İttifaqının bağlantı layihələrinə böyük əhəmiyyət verdiyini bildirdi. O, gələcəkdə Azərbaycanda qitələri birləşdirən beynəlxalq bağlantı konfransının keçirilməsinə ümid etdiyini ifadə etdi. Bu yanaşma bir daha Azərbaycanın Şərqlə Qərbi birləşdirən mühüm nəqliyyat-logistika mərkəzi kimi artan rolunun Avropa İttifaqı tərəfindən yüksək qiymətləndirildiyini sübut edir

Avropa Komissiyasının Prezidenti çıxışında Azərbaycanın təşəbbüsü ilə regionda sülhün möhkəmləndirilməsinə dəstəyini söyləyib. Bildirildi ki, "Sülhün inkişafı" proqramı çərçivəsində Azərbaycana 20 milyon avro vəsait ayrılacaq. Bu maliyyə dəstəyi əsasən humanitar minatəmizləmə işlərinə, təhlükəsizliyin möhkəmləndirilməsinə və təcili tibbi xidmətlərin inkişafına yönəldiləcək. Bu isə Avropa İttifaqının postmünaqişə dövründə regionda davamlı sülhün və sabitliyin təmin olunmasına maraq göstərdiyini nümayiş etdirir.

Ursula Fon der Lyayenin səfəri və səsləndirilən fikirlər onu göstərir ki, Avropa İttifaqı Azərbaycanın yaratdığı yeni regional reallıqları dəstəkləyir, sülh gündəliyini və əməkdaşlıq təşəbbüslərini qəbul edir. Bu yanaşma Azərbaycan-Avropa İttifaqı münasibətlərinin qarşıdakı dövrdə daha da genişlənəcəyinə, enerji, nəqliyyat, yaşıl enerji, rəqəmsal iqtisadiyyat və investisiya sahələrində yeni əməkdaşlıq imkanlarının yaranacağına əsas verir".

Telegramda izləyin