Buzlu su sizi sərinləşdirmir, əksinə... - Ekspertdən gözlənilməz açıqlama

İsti havada bir stəkan buzlu su içmək, soyuq duş qəbul etmək və ya çaya girməklə sərinləşməyə çalışmaq təhlükəli illüziya ola bilər.

Oxu.Az Gazeta.ru-ya istinadən xəbər verir ki, bu barədə fizioloq Nina Duvanova xəbərdarlıq edib.

Ekspert izah edib ki, insan bürkülü havada qəfil soyuq suya daxil olduqda, orqanizm damarların reflektor spazmı ilə reaksiya verir.

"Damar spazmı arterial təzyiqin qəfil yüksəlməsinə, nəbzin sürətlənməsinə və ürəyə kritik yük düşməsinə səbəb olur. Bu vəziyyət, xüsusilə, hipertoniya və aterosklerozdan əziyyət çəkən insanlar üçün təhlükəlidir. Nəticədə aritmiya, infarkt və ya insult riski arta bilər. Hətta gənc və sağlam insanlar da soyuq şokundan sığortalanmayıblar", - deyə o bildirib.

Nina Duvanova qeyd edib ki, buzlu içkilər orqanizmi susuzluqdan xilas etmir, əksinə, vəziyyəti daha da ağırlaşdıra bilər.

"Soyuq maye mədə-bağırsaq traktında damarların spazmına səbəb olur və suyun sorulmasını çətinləşdirir. Orqanizm daxil olan mayeni qızdırmaq üçün əlavə enerji sərf edir. Beləliklə, qapalı dairə yaranır: nə qədər çox soyuq su içirsinizsə, yorğunluq və susuzluq hissi bir o qədər artır", - deyə fizioloq vurğulayıb.

Onun sözlərinə görə, soyuq içkilərdən uzun müddət və həddindən artıq istifadə şişkinlik, halsızlıq, köp, mədə-bağırsaq sistemində ağırlıq hissi və yorğunluğa səbəb ola bilər. Qadınlarda isə menstrual dövrün pozulması riski yarada bilər.

Riskdən qorunmaq üçün mütəxəssis aşağıdakı tövsiyələri verib:

- otaq temperaturunda olan suyu kiçik qurtumlarla için;

- mayeni udmazdan əvvəl qısa müddət ağızda saxlayaraq isinməsinə imkan verin;

- əllərinizi və biləklərinizi sərin suyun altında saxlayaraq bədəninizi sərinlədin;

- ayaq pəncələrinə və baldırlara sərin su tökün;

- kuperoz yoxdursa, üz və boyun nahiyəsini buz parçası ilə silin.

Mütəxəssis vurğulayıb ki, bədəni soyuğa alışdırmağa 40 dərəcəlik istidə deyil, tədricən başlamaq lazımdır.

Ekspert əlavə edib ki, Şərq ölkələrində qədimdən isti havalarda isti çay içilməsi ənənəsi mövcuddur. Bu, tərləmə prosesini sürətləndirir və orqanizmin təbii yolla soyumasına kömək edir.

Telegramda izləyin