"Qadının boşanmış olması onu qətlə yetirən şəxsi cinayet məsuliyyətindən azad etmir" - Sosioloq

"Bu gün cəmiyyətdə boşanmış qadınlara münasibət birmənalı deyil. Son illərdə yanaşma müəyyən qədər dəyişsə də, bəzi stereotiplər hələ də qalmaqdadır.Təəssuf ki, boşanmalarda kişilər deyil, qadınlar qınanılır. Boşanmanın səbəbi araşdırılmadan məsuliyyət çox vaxt qadının üzərinə qoyulur. Hətta kişi narkoman olsa da, xəyanət etsə də, həyat yoldaşına və uşaqlara qarşı fiziki zorakılıq göstərsə də yenə də boşandığına görə qadın qınanılır".

Bunu Sonxeber.az-a danışan sosioloq Günel Məmmədova bildirib:

Sosioloq qeyd edib ki, boşanmış qadınlara sosial təzyiqlər də çox olur:

"Qohumlar və ətraf tərəfindən "yenidən ailə qurmalıdır" və ya "ailəni qorumalı idi" kimi fikirlər səsləndirilə bilirlər. Səbəb kimi də qohum və qonşuların qızı boşanan ailəyə yaxşı baxmaması ilə əlaqələndirirlər. İş və sosial münasibətlərdə ayrı-seçkilik və bəzi hallarda isə boşanmış qadınlara qarşı əsassız mənfi yanaşma müşahidə olunur. Nəticədə də qınaq, tənhalıq hissi və övladların məsuliyyəti qadın üçün əlavə yük və psixoloji problemlər yaradır".

"Təəssüf ki, heç kim təkbaşına uşaq böyütmək həm maddi, həm də mənəvi baxımdan qadın üçün nə qədər ağır olduğunu düşünən insanlar azdır. Boşanan qadınlar günahsız yerə qətlə yetiriləndə belə insanlarımız günahı kişi də deyil, öləndə görürlər. Hətta qadını əxlaqsızlıqda günahlandıran insanlar da olur. Bütün bu problemlərin kökündə bu gün namus yükünün yalnız qadınlara yüklənməsidir. Kiçik yaşlarından başlayaraq ailələrdə qız uşaqlarına bütün nəslin namusu yükünü daşımalı olduqları aşılanır.

Bununla yanaşı, cəmiyyətdə müsbət dəyişikliklər də var. Təhsil səviyyəsinin yüksəlməsi, qadınların iqtisadi müstəqilliyinin artması və hüquqi maariflənmə nəticəsində boşanmış qadınlara daha anlayışlı yanaşan insanların sayı artır.

Bəzi insanlar düşünürlər ki, boşanmış qadını qətlə yetirəndə ona heç bir cəza düşmür. Hətta cəzalarının azaldılması üçün törətdikləri cinayətə namus donu geyindirməyə çalışanlar, qadını əxlaqsızlıqda ittiham edənlər də var. İnsanlar unudurlar ki, qanun qarşısında boşanmış qadınlar digər vətəndaşlarla eyni hüquqlara malikdirlər. Boşanmış olduğuna görə onun qətlə yetirilməsi şəxsi cinayet məsuliyyətdən azad etmir. Qətl və zorakılıq törədən şəxs qanunla layiq olduğu cəzanı alır", - deyə sosioloq vurğulayıb.

Telegramda izləyin