"Sosial şəbəkələrdə qeydiyyata qoyulan məhdudiyyət uşaqları bu platformalarda qarşılaşa biləcəkləri kiberzorakılıqdan qoruyacaq" - DEPUTAT

"16 yaşa qədər uşaqlara sosial şəbəkələrdə qeydiyyatına məhdudiyyət qoyulması uşaqları kiberzorakılığa məruz qalmasının qarşısını alacaq".

Bunu Sonxeber.az-a danışan deputat Müşfiq Məmmədli bildirib.

Deputat qeyd edib ki, son dövrlər sosial şəbəkələrdə kiberzorakılıq halları çoxalıb:

Kiberzorakılıq sosial şəbəkələr və digər rəqəmsal platformalar vasitəsilə bir şəxsin təhqir edilməsi, təhdid olunması, alçaldılması və ya narahat edilməsidir. Təəssüf ki, kiberzorakılıq uşaqlar və yeniyetmələr arasında geniş yayılıb və ciddi psixoloji təsirlər yarada bilər.

Ən çox rast gəlinən kiberzorakılığın ən çox rast gəlinən formaları:
-Təhqir və alçaldıcı şərhlər yazmaq.
-Təhdid mesajları göndərmək.
-Yalan məlumat və şayiələr yaymaq.
-Şəxsi foto və videoları icazəsiz paylaşmaq.
-Saxta profil açaraq kimisə nüfuzdan salmaq
-Bir şəxsi qrup söhbətlərindən və ya sosial platformalardan qəsdən kənarda saxlamaq.
-Davamlı təqib və israrlı narahat etmə.

Bütün bu sadaladıqlarım insan psixologiyasına xüsusilə də uşaqlarda ciddi problemlərə gətirib çıxarır. Belə ki, kiberzorakılıq stress, qorxu və narahatlıq, depressiya və özünəinamın azalması, təhsildə və işdə uğurun aşağı düşməsi, sosial münasibətlərdən uzaqlaşma hətta özünə zərər vermə və ya intihar riskini çoxaldır.Ona görə də düşünürəm ki, 16 yaşa qədər uşaqlara sosial şəbəkələrdə qeydiyyatına məhdudiyyət qoyulması zamanında verilmiş qərardı. Artıq bir çox ölkələrdə uşaqların sosial şəbəkələrdən istifadəsinə məhdudiyyət qoyulub. Məqsəd isə uşaqlar və yeniyetmələrin psixoloji sağlamlığını qorumaq və sosial platformalarda qarşılaşa biləcəkləri kiberzorakılığın qarşını almaqdır.

Deputat vurğulayıb ki, sosial şəbəkələrdən asılılıq uşaqların təhsilinə də mənfi təsir göstərir:

"Bütün vaxtlarını sosial şəbəkələrdə keçirmək elmə və təhsilə olan marağı azaldır. Sosial şəbəkə asılılığı akademik nəticələrin zəifləməsinə gətirib çıxarır, dərs zamanı diqqətin yayınmasına və vaxt itkisinə səbəb olur. Yanlış və etibarsız məlumatların yayılması düzgün bilik əldə etməyə mane olur.Yuxu rejiminin pozulması isə uşaqlarda diqqət və yaddaşın zəifləməsinə səbəb ola bilər. Ona görə bu məhdudiyyətin qoyulması doğru qərardır. Sosial şəbəkələrə qoyulan məhdudiyyət uşaqlarda təhsilə, idmana və da faydalı sahələrə olan marağı artıracaq, gələcəyimizin daha savadlı və sağlam olmasına kömək edəcək".

Telegramda izləyin