"Qondarma soyqırımla bağlı qərarqəbuletmə prosesini dayandırmasında Azərbaycan-İsrail münasibətəri öz təsirini göstərdi" - DEPUTAT

"Azərbaycan uğurlu diplomatik gedişi, yaxın və uzaq ölkələrlə qurduğu qarşılıqlı faydalı əməkdaşlığı ilə təkcə özünün deyil, dost-qardaş ölkələrinin də milli maraqlarını qoruya, onun müdafiəçisi qismində çıxış edə bilir. Son günlər qondarma "erməni soyqırımı" məsələsi üzərindən İsrailin Türkiyəyə qarşı təzyiqlərinin neytrallaşdırılmasında da Azərbaycanın mövqeyi, ortaya qoyduğu yanaşma eyni tendensiyanı təsdiqlədi. Bildiyiniz kimi ötən ayın sonlarında İsrail hökumət kabineti qondarma erməni soyqırımını tanıyan qərar qəbul etdi. Təl-Əvivin bu addımı təkcə Türkiyə deyil, Azərbaycanda da haqlı narazılığa səbəb oldu. Azərbaycan Xarici İşlər Nazirliyinin məsələ ilə bağlı yaydığı bəyanatda Bakının məsələ ilə bağlı narahatlığı və bunun qəbuledilməz olduğu vurğulandı".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, cərəyan edən proseslər fonunda diqqət çəkən məqam Təl-Əvivin Bakının mövqeyinə hörmətlə yanaşması, Azərbaycan cəmiyyətinin haqlı narazılığını həssaslıqla qarşılaması oldu:

"Nəticə etibarilə İsrail qondarma soyqırımla bağlı Türkiyəyə təzyiq vasitəsi kimi istifadə etdiyi prosesi dayandırdı.

Heç şübhəsiz ki, Təl-Əvivin qondarma soyqırımla bağlı qərarqəbuletmə prosesini dayandırmasında Bakının mövqeyi mühüm rol oynayıb. Bu mövqenin dəyişməsinə yüksək səviyyədə olan Azərbaycan-İsrail münasibətəri ilə yanaşı, İsraildə fəaliyyət göstərən müxtəlif təşkilatların, diaspor fəalları, ayrı-ayrı sahələrdə tanınmış ictimai-siyasi xadimlərin etiraz bəyanatları da öz təsirini göstərdi.

Ən əsası Azərbaycanın ortaya qoyduğu mövqe həm də İsrail, eləcə də bütün dünya üçün bir daha xatırlatma oldu ki, Azərbaycan hər zaman Türkiyənin yanında yer alıb. Türkiyənin maraqları bütün anlamlarda həm də Azərbaycanın maraqlarıdır və bu prinsipial mövqe dəyişməz olaraq qalır".

Telegramda izləyin