Bu gün Şuşa qlobal siyasi dialoqun, media diplomatiyasının və beynəlxalq fikir mübadiləsinin mühüm platformasına çevrilib

"Şuşada keçirilən Qlobal Media Forumunda Azərbaycan Prezidenti cənab İlham Əliyevin beynəlxalq media nümayəndələrinin suallarını açıq, arqumentli və prinsipial şəkildə cavablandırması bir daha göstərdi ki, Azərbaycan bu gün yalnız regional proseslərin iştirakçısı deyil, həm də həmin proseslərin istiqamətini müəyyənləşdirən əsas siyasi mərkəzlərdən biridir.

Forumun əsas mövzusu "Sülhün təşviqində medianın missiyası: Həqiqətin bərpası və etimadın yenidən qurulması" - təsadüfi seçilməyib. Son illər informasiya müharibələrinin klassik müharibələr qədər təhlükəli xarakter alması medianın məsuliyyətini daha da artırıb."

Bu fikirləri Sonxeber.az-a danışan Səs qəzetinin baş redaktoru, siyasi ekspert Bəhruz Quliyev deyib.

Ekspert bildirib ki, Prezident İlham Əliyev də çıxışında məhz bu məqama diqqət çəkərək vurğuladı ki, dezinformasiyanın deyil, həqiqətin yayılması davamlı sülhün əsas şərtlərindən biridir.Dövlət başçısının çıxışında bir neçə strateji istiqamət xüsusi diqqət çəkdi

İlk növbədə, Cənubi Qafqazda davamlı sülhün təmin olunması ilə bağlı Azərbaycanın mövqeyi bir daha beynəlxalq auditoriyaya çatdırıldı. Prezident bəyan etdi ki, Azərbaycan müharibə səhifəsini bağlayıb və regionda yeni əməkdaşlıq mühitinin formalaşmasında maraqlıdır. Bununla yanaşı, sülhün birtərəfli deyil, qarşılıqlı öhdəliklər və beynəlxalq hüquq prinsipləri əsasında mümkün olduğu açıq şəkildə ifadə edildi.

İkinci mühüm istiqamət media və informasiya təhlükəsizliyi ilə bağlı idi. Prezident vurğuladı ki, müasir dövrdə informasiya manipulyasiyası dövlətlərarası münasibətlərə ciddi təsir göstərir. Buna görə də peşəkar jurnalistika faktlara söykənməli, ictimai rəyə təsir göstərən saxta məlumatlara qarşı prinsipial mövqe nümayiş etdirməlidir.
"Forum çərçivəsində Azərbaycanın xarici siyasət kursunun dəyişməz prinsipləri də bir daha təsdiqləndi. Müstəqil siyasət, milli maraqların qorunması, qarşılıqlı hörmətə əsaslanan beynəlxalq əməkdaşlıq və çoxtərəfli diplomatiya ölkəmizin əsas prioritetləri kimi təqdim olundu.

Prezident İlham Əliyevin çıxışında iqtisadi inkişaf, nəqliyyat dəhlizləri, enerji təhlükəsizliyi və yaşıl enerji layihələri də xüsusi yer tutdu. Azərbaycanın Avropa ilə Asiyanı birləşdirən etibarlı logistika mərkəzi kimi rolu, enerji ixracının şaxələndirilməsi və bərpa olunan enerji layihələrinin genişləndirilməsi ölkənin strateji əhəmiyyətini daha da artıran amillər kimi qiymətləndirildi.

Qarabağ və Şərqi Zəngəzurda aparılan genişmiqyaslı bərpa və yenidənqurma işləri də Prezidentin cavablarında mühüm yer aldı. Bildirildi ki, işğaldan azad olunmuş ərazilər təkcə bərpa edilmir, eyni zamanda ən müasir şəhərsalma, rəqəmsal idarəetmə və "yaşıl enerji" konsepsiyası əsasında yenidən qurulur. Şuşada beynəlxalq media forumunun keçirilməsi də bu reallığın dünya ictimaiyyətinə təqdim edilməsinin mühüm vasitəsidir.

Bütün bunlar göstərir ki, Şuşa artıq yalnız Azərbaycanın mədəniyyət paytaxtı deyil, eyni zamanda qlobal siyasi dialoqun, media diplomatiyasının və beynəlxalq fikir mübadiləsinin mühüm platformasına çevrilib.
Prezident İlham Əliyevin Forum çərçivəsində verdiyi mesajların əsas mahiyyəti ondan ibarətdir ki, həqiqətin müdafiəsi, etimadın bərpası və ədalətli informasiya mühitinin formalaşdırılması XXI əsrdə sülh siyasətinin ayrılmaz tərkib hissəsidir. Azərbaycan da bu prosesdə həm siyasi iradəsi, həm də beynəlxalq təşəbbüsləri ilə fəal rol oynamaqda davam edir."-deyə, B.Quliyev əlavə edib.

Telegramda izləyin