Gecə saatlarında aparılan tikinti işləri sakinləri narahat edir" - Yeni Günəşli sakinlərindən şikayət - VİDEO

Bakının Suraxanı rayonu, Yeni Günəşli qəsəbəsi, AB yaşayış sahəsi, 157 saylı binanın sakinləri gecə saatlarında aparılan tikinti işlərindən narazıdırlar. Onların sözlərinə görə, işlər gecə saatlarında da davam etdirilir və bu, ərazidə yaşayan insanların istirahətinə ciddi maneə yaradır.

Sonxeber.az-a daxil olan müraciətdə bildirilir ki, tikinti işləri hətta həftə sonları və istirahət günlərində də dayandırılmır:

"Hazırda sizə təqdim etdiyimiz video bu dəqiqə çəkilib. Saat 22:44-də tikinti işləri davam edir. Həftə sonları belə insanların dincəlməsinə imkan verilmir. Xahiş edirik ki, məsələ ilə bağlı aidiyyəti qurumlar tədbir görsün"

Sakinlər qeyd edirlər ki, təqdim olunan videoda səs minimum səviyyədə eşidilsə də, ərazidə aparılan qazıntı işləri zamanı yaranan səs-küy və toz gündəlik həyatlarını çətinləşdirir.
"Qazıntı işləri gedən zaman ümumiyyətlə qapı və pəncərələri bağlamağa məcbur oluruq. Səs-küy və toz səbəbindən evdə rahat oturmaq mümkün olmur", - deyə müraciətdə bildirilir.

Sakinlər aidiyyəti dövlət qurumlarından gecə saatlarında aparılan tikinti işlərinin qanunvericiliyin tələblərinə uyğunluğunun araşdırılmasını və problemin aradan qaldırılması üçün müvafiq tədbirlərin görülməsini xahiş edirlər.

Qeyd: Yazıda yer alan fikirlər müraciət edən sakinlərin iddialarını əks etdirir. Məsələ ilə bağlı aidiyyəti qurumların mövqeyini də dərc etməyə hazırıq.

Telegramda izləyin