"The Odyssey" rekordlar qırır: Rejissorun qadağaları diqqət çəkir

Rejissor Kristofer Nolanın Homerin məşhur "Odisseya" dastanı əsasında çəkdiyi "The Odyssey" filmi nümayişə başladıqdan sonra böyük maraqla qarşılanıb. Film bir çox ölkədə rekord göstəricilər əldə edərkən, bəzi yerlərdə biletlərin qara bazarda satıldığı bildirilir.

Qaynarinfo xəbər verir ki, tamamilə IMAX kameraları ilə lentə alınan film son illərin ən çox gözlənilən ekran işlərindən biri hesab olunur. ABŞ-da kinosevərlərin bilet tapmaqda çətinlik çəkdiyi, hətta əvvəlcədən alınmış biletlərin qeyri-rəsmi satışlarda minlərlə dollara təklif edildiyi iddia olunur.
Nəhəng büdcəli layihə

250 milyon dollar büdcə ilə çəkilən "The Odyssey" altı müxtəlif ölkədə lentə alınıb. Çəkilişlər zamanı ümumilikdə 600 kilometr uzunluğunda 70 millimetrlik IMAX kinolentindən istifadə olunub.

Məlumata görə, film nümayişə başladıqdan qısa müddət sonra dünya üzrə 280 milyon dollardan çox gəlir əldə edərək istehsal büdcəsini geri qaytarıb. Bununla yanaşı, layihənin reklam kampaniyasına da büdcəsinə yaxın həcmdə vəsait xərcləndiyi bildirilir.

Filmdə Mett Deymon, Zendaya, Tom Holland, Şarliz Teron, Lupita Nyonqo, Con Bernthal, Con Leqizamo, Mia Qot, Elliot Peyc və Samanta Morton kimi tanınmış aktyorlar rol alırlar.

Nolanın çəkiliş meydançasındakı sərt qaydaları

Kristofer Nolan uzun illərdir çəkiliş meydançasında tətbiq etdiyi ciddi qaydalarla tanınır. Onun ağıllı telefon və elektron poçtdan istifadə etmədiyi dəfələrlə qeyd olunub.

Filmdə baş rollardan birini canlandıran Enn Heteuey bildirib ki, rejissor çəkiliş zamanı "alternativ reallıq atmosferi yaratmaq" məqsədilə bir sıra əşyaların istifadəsini qadağan edib.
Onun sözlərinə görə, çəkiliş meydançasında "UGG" markalı çəkmələrin geyinilməsinə, mobil telefonlardan istifadəyə və hətta stullarda oturmağa icazə verilməyib.

Bundan əlavə, siqaret çəkmək və plastik su butulkalarından istifadə də qadağan edilib.

Filmin digər baş rol ifaçısı Robert Pattinson bildirib ki, aktyor heyəti çəkilişlər başlamazdan əvvəl sandallarla təxminən 45 dəqiqə piyada düşərgəyə getməli olurdu.
UGG çəkmələri reallıq hissini pozur

Kristofer Nolan "CBS Mornings" proqramında bu qərarlarını belə izah edib:

"Qəribədir ki, bu, çox qədim bir hekayə olsa da, çəkiliş meydançasında mikrofon tutan insanlar, böyük kameralar və çoxsaylı texniki heyət olur. Amma UGG çəkmələri kimi bir detal insanı qəribə şəkildə həmin dünyanın atmosferindən uzaqlaşdıra bilir".

Rejissor bildirib ki, məqsədi aktyorların müasir dünyanın təsirindən uzaqlaşaraq tamamilə ekran əsərinin atmosferinə daxil olmalarını təmin etməkdir.
"Bizim yaratmağa çalışdığımız dünya ilə real dünya fərqlidir. Mən istəyirəm ki, hamı həmin anın içində yaşasın", deyə Nolan vurğulayıb.

Çəkilişlər dağ zirvəsində başlayıb

Nolan qeyd edib ki, filmin ilk çəkilişləri təxminən 1000 metr yüksəklikdə yerləşən dağ zirvəsində aparılıb. Həmin əraziyə yol çəkilmədiyi üçün aktyorlar çəkilişlərə başlamazdan əvvəl uzun məsafəni piyada qət etməli olublar.
Rejissor bunu aktyorların ekran qarşısında daha təbii emosiyalar nümayiş etdirməsinə kömək edən üsullardan biri kimi qiymətləndirib.

Ailə üzvləri də layihədə iştirak edib

"The Odyssey" Kristofer Nolan üçün ailə layihəsinə də çevrilib. Rejissorun həyat yoldaşı Emma Tomas filmin prodüseri olub.

Onun 25 yaşlı oğlu Rori rəssamlıq departamentində, 25 yaşlı qızı Flora kostyum şöbəsində, 18 yaşlı oğlu Maqnus isə istehsal üzrə köməkçi kimi çalışıb.

Telegramda izləyin