Əməliyyatdan sonra xəstə ölümlərinin səbəbi nədir? - AÇIQLAMA

Əməliyyatın uğurla başa çatması xəstənin təhlükəni tam geridə qoyması anlamına gəlmir. Əməliyyat zamanı və sonrakı dövrdə qanaxma, infeksiya, tənəffüs və ürək-damar problemləri, tromboz, orqan çatışmazlığı, eləcə də anesteziya ilə bağlı ağırlaşmalar həyati risk yarada bilər.

Bəs, əməliyyatdan sonra xəstənin ölümünə daha çox hansı risk və ağırlaşmalar səbəb olur, bu hallarda əməliyyatın özü, anesteziya, yoxsa əməliyyatdan sonrakı dövr daha böyük risk daşıyır və ölüm hallarının qarşısını almaq üçün hansı tədbirlər görülməlidir?
Mövzu ilə bağlı Sonxeber.az-a açıqlama verən tibb eksperti Adil Qeybulla bildirib ki, əməliyyatdan sonra baş verən ölüm halları ilə bağlı suala birmənalı cavab vermək çətindir:

"Çünki burada müxtəlif amillər rol oynaya bilər. Xəstənin əməliyyata qədərki sağlamlıq vəziyyəti, yanaşı xəstəlikləri və digər risk faktorları nəzərə alınmalıdır. Azərbaycan reallığında xəstələrin ağırlaşmasının və bəzi hallarda ölüm hallarının əsas səbəblərindən biri həkimə gec müraciət edilməsidir. Xüsusilə yanaşı ağır xəstəliklərin olması ciddi fəsadlara səbəb ola bilər".

Ekspert bildirib ki, hamiləlik dövründə qadınların vaxtında həkimə müraciət etməməsi müxtəlif risklər yaradır:

"Hamiləlik zamanı hepatit B və ya C kimi yanaşı xəstəliklərin olması doğuş zamanı ciddi fəsadlara, hətta ağır qaraciyər çatışmazlığı nəticəsində ölümə səbəb ola bilər. Bundan əlavə, qanaxma və digər ağırlaşmalar da baş verə bilər. Buna görə hamiləlik planlaşdırılmalı və qadınlar hamiləliyin ilk dövrlərindən etibarən vaxtında həkim nəzarətində olmalıdırlar. Xəstələrin gec müraciəti xüsusilə onkoloji xəstəliklərdə özünü göstərir. Bəzi xəstələr həkimə müraciət etmək əvəzinə ev şəraitində, tanışların və ya qonşuların məsləhəti əsasında müxtəlif müalicələr aparırlar. Bu isə xəstəliyin daha da ağırlaşmasına, sonradan müalicənin mümkün olmamasına və ya xəstənin əməliyyat edilə bilməyəcək vəziyyətə düşməsinə səbəb ola bilər. Bəzən isə ağırlaşmalar əməliyyat riskini əhəmiyyətli dərəcədə artırır".

Onun sözlərinə görə, tibbdə həkim səhvləri də mümkündür. Lakin bu hallar sadalanan digər risk faktorları ilə müqayisədə daha az rast gəlinir:

"Əsas məsələ insanların vaxtında həkimə müraciət etməsi, tibbi xidmətə etibar etməsi və qeyri-peşəkar məsləhətlər əsasında özbaşına müalicədən uzaq durmasıdır. Xüsusilə hamiləlik kimi mühüm proseslər əvvəlcədən planlaşdırılmalı və müvafiq tibbi nəzarət təmin edilməlidir. Ümumilikdə isə bu məsələlər cəmiyyətin sağlamlığa münasibəti ilə də bağlıdır. Sağlamlığın qorunması üçün vaxtında müayinə və həkimə müraciət əsas şərtlərdən biridir".

Röyalə Xəyal

Telegramda izləyin