The Wall Street Journal: "ABŞ Çinin gəmiqayırma üstünlüyünü azaltmaq üçün Cənubi Koreyaya üz tutur"

ABŞ gəmiqayırma sənayesini yenidən gücləndirmək üçün Cənubi Koreyanın texnologiyasından və sərmayəsindən yararlanmağa çalışır.

Sonxeber.az The Wall Street Journal-a istinadən xəbər verir ki, Vaşinqton bu sahədə Çindən ciddi şəkildə geri qalır və mövqeyini bərpa etmək üçün müttəfiqlərinin dəstəyinə ehtiyac duyur.

Qəzetin məlumatına görə, ABŞ-ın gəmiqayırma imkanlarını artırmaq planında Cənubi Koreyanın Hanwha Ocean şirkəti əsas rol oynayır. Şirkət 2024-cü ilin dekabrında Filadelfiyadakı gəmiqayırma müəssisəsini əldə etdikdən sonra onun yenilənməsinə təxminən 350 milyon dollar xərcləyib. Daha 400 milyon dollarlıq sərmayə təsdiqlənib, gələcəkdə isə milyardlarla dollar əlavə investisiya nəzərdə tutulur.

Məqalədə diqqətçəkən rəqəm də yer alır: ABŞ dünya gəmiqayırma istehsalının 1 faizindən azını təmin edir. Çinin istehsal gücü isə ABŞ-ın göstəricisindən 230 dəfədən çoxdur.

Cənubi Koreya hökumətinin də ABŞ gəmiqayırma sektorunun inkişafı üçün 150 milyard dollarlıq investisiya öhdəliyi götürdüyü bildirilir. Bundan başqa, Cənubi Koreyanın HD Hyundai şirkəti ABŞ-ın Kiewit şirkəti ilə yeni gəmiqayırma müəssisəsinin yaradılması üzrə əməkdaşlığa başlayıb.

Lakin planın qarşısında ciddi maneələr var. ABŞ-da istehsal xərclərinin yüksək olması, təchizatçı çatışmazlığı və Pentaqonun gələcək sifarişlərinin qeyri-müəyyənliyi investorların qərarlarına təsir edir.

ABŞ Çinin sənaye və hərbi gəmiqayırma sahəsində üstünlüyünü azaltmaq üçün yalnız daxili istehsala deyil, Cənubi Koreya kimi müttəfiqlərinin texnologiyasına və kapitalına da güvənir.

Müəllif: İlkin Məmmədkərimov

Telegramda izləyin