HSBC-nin mənfəəti artsa da, səhmləri kəskin ucuzlaşıb

Avropanın ən böyük bankı HSBC-nin üçüncü rüb üzrə mənfəəti artsa da, maliyyə nəticələrinin investorların gözləntilərini tam qarşılamaması səhmlərin ucuzlaşmasına səbəb olub. Financial Times qəzetinin məlumatına görə, bankın səhmləri çərşənbə axşamı təxminən 7 faiz dəyər itirib.

Bankın vergidən əvvəlki mənfəəti ötən ilin eyni dövrü ilə müqayisədə 32 faiz artaraq 9,6 milyard dollara çatıb. Gəlirlər isə 5 faiz yüksələrək 18,6 milyard dollar təşkil edib.

Sonxeber.az Financial Times-a istinadən xəbər verir ki, buna baxmayaraq, investorlar bankın illik maliyyə proqnozlarını yaxşılaşdırmamasından narazı qalıblar. Xüsusilə yüksək faiz dərəcələri və xərclərin azaldılması tədbirləri fonunda daha yaxşı nəticələr gözlənilirdi.

HSBC eyni zamanda səhmlərinin 1 milyard dollaradək məbləğdə geri alınacağını açıqlayıb. Bankın əməliyyat xərcləri azalsa da, mümkün kredit itkiləri üçün 832 milyon dollar ehtiyat ayrılıb. Bu məbləğin bir hissəsi Honkonqdakı kommersiya daşınmaz əmlak bazarı ilə bağlı risklərə aiddir.

Müəllif: İlkin Məmmədkərimov

Telegramda izləyin