Dentstom sağlamlıq, yoxsa təhlükə mərkəzi?

İnsan sağlamlığının heçə sayıldığı iddia edilən daha bir klinikadan şikayət var.

Sonxeber.az BTV-yə istinadən xəbər verir ki, Dentstom Sağlamlıq Mərkəzi ilə bağlı redaksiyamıza daxil olan şikayətlər ciddi suallar doğurur. İddialara görə, Sariyev İlqar Xəlil oğlu tibbi sertifikasiya şəhadətnaməsi və hətta müvafiq ali təhsil diplomu olmadan stomatoloq kimi fəaliyyət göstərir.

Belə olan halda sual yaranır: Səhiyyə Nazirliyi və digər aidiyyəti dövlət qurumları bu cür tibb müəssisələrinin fəaliyyətinə hansı əsaslarla icazə verir? Klinikaların fəaliyyəti hansı müddətlərdə yoxlanılır və tibbi personalın peşə ixtisasına nəzarət necə həyata keçirilir?

Daha ciddi narahatlıq doğuran məqam isə müvafiq tibbi təhsili və ixtisası olmayan şəxslərin cərrahi müdaxilələr həyata keçirməsi ilə bağlı səsləndirilən iddialardır. Bu cür halların təsdiqlənəcəyi təqdirdə, vətəndaşların həyatı və sağlamlığı ciddi təhlükə altında qala bilər.

Aidiyyəti qurumların susqunluğu isə əlavə suallar doğurur: Nə üçün belə iddialar vaxtında araşdırılmır? Vətəndaşların sağlamlığına təhlükə yarada biləcək hallara hansı səbəbdən müdaxilə edilmir? Bu müəssisələrin fəaliyyətinə nəzarət mexanizmləri nə dərəcədə effektivdir?

BTV məsələ ilə bağlı Səhiyyə Nazirliyindən və digər aidiyyəti qurumlardan rəsmi açıqlama və araşdırma aparılmasını tələb edir.

Qeyd: Qarşı tərəfin mövqeyini dərc etməyə hazırıq.

Telegramda izləyin