Azərbaycanda biznesmen arvadı və baldızı ilə bağlı elə xəbər yayıldı ki...

Saxta sənəd düzəltməkdə, dələduzluqda və polisə müqavimət göstərməkdə təqsirləndirilən Təyminə Abdullayevanın cinayət işi üzrə məhkəməsinin hazırlıq iclası davam edib.

Sonxeber.az Lent.az-a istinadən məlumat verirki, Bakı Ağır Cinayətlər Məhkəməsində hakim Ramella Allahverdiyevanın sədrliyi ilə keçirilən prosesdə məhkəmə istintaqı açıq elan edilib.

Söz dövlət ittihamçısı Sabir Abdinova verilib. Prokuror ittiham aktının nəticəvi hissəsini elan edib.

İttihama münasibət bildirən Təyminə Abdullayeva özünü təqsirli bilməyib.

Prosesdə ilk əvvəl zərərçəkmişlərin dindirilməsi ilə bağlı qərar qəbul edilib.

Vəkil Janna Bağırova vəsatətlə çıxış edərək bu işin iki hissəyə ayrılmasını istəyib. O, bildirib ki, əvvəlcə saxta sənəd düzəltmək və dələduzluq ittihamı üzrə araşdırılma aparılsın, daha sonra polisə müqavimət ittihamına baxılsın.

Təyminə Abdullayevanın digər vəkili Vasif İsarfilov da vəsatətin təmin edilməsini tələb edib: "İndiyə qədər müdafiə tərəfinin verdiyi vəsatətlər təmin edilməyib. Müdafiə tərəfinin vəsatəti təmin edilsin ki, açıq-aydın müdafiə tərəfinin sübutları araşdırılsın".

Vəsatət təmin edilməyib.

Daha sonra Janna Bağırova prosesin video-görüntü ilə aparılması ilə bağlı vəsatət verib. Lakin bu vəsatət də hakimlər tərəfindən təmin edilməyib.

Daha sonra prosesdə zərərçəkmiş polis əməkdaşı Oqtay Məmmədov ifadə verib. O ifadəsində bildirib ki, 17-ci Polis Bölməsinin əməkdaşıdır: " Hadisə iyunun 17-də olub. Bölmədə idik. İş yoldaşım Orxan Babayevlə bizə bildirdilər ki, Cinayət Məcəlləsinin 178-ci maddəsi ilə axtarışda olan Təyminə Abdullayevanı saxlamaq əmri verilib. Bölmədə qadın barəsində məcburi gətirilmə haqda qərar vardı. Biz də onun yaşadığı mənzilə getdik. Sonra Təyminə Abdullayeva yaxınlaşdıq. Özümüzü təqdim etdik. Vəsiqəmizi göstərdik. O, bizlə getməyəcəyini dedi. Etiraz elədi. Qollarından tutduq. Bacısı və bacısı qızı da üstümüzə hücum çəkdi. Təyminə Abdullayeva dırnaqları ilə qollarıma xəsarət yetirdi. Təyminənin bacısı Rəna da Orxana müqavimət göstərib, ona yumruq vuraraq xidmətini aparmağa imkan vermirdi".

Digər zərərçəkmiş şəxs Orxan Babayev də Oqtay Məmmədovla oxşar ifadə verib.

Təqsirləndirilən şəxsin vəkillərinin suallarına cavab verən Orxan Babayev bildirib ki, artıq polis sıralarından çıxıb: "Şəxsi məsələlərə polis sıralarından çıxmışam. Həmin vaxtı da bölmədə Təyminə Abdullayeva ilə bağlı rəsmi olaraq məcburi gətirilmə haqqında qərar vardı. Bizə də rəis tapşırıq vermişdi gedib, icra etmişik"

Təyminə Abdullayevin vəkili Janna Bağırova məhkəməyə sənəd təqdim edib. Sənəddə vəkil 17-ci polis bölməsinə yolladığı sorğunun nəticəsini məhkəməyə verib. Sorğuda bildirilir ki, heç zaman Təyminə Abdullayeva barəsində polis bölməsində məcburi gətirilmə haqda qərar olmayıb.

Orxan Babayev bildirib ki, həmin sənədi Oqtay Məmmədovun əlində görüb.

Polis əməkdaşı vəkillərin suallarının bir çoxuna cavab verə bilməyib.

Məhkəmə prosesi mayın 24-də davam edəcək.

Xatırladaq ki, T.Abdullayeva ötən il iyunun 21-də polis tərəfindən saxlanılıb və barəsində heç yerə getməməklə bağlı iltizam tədbiri seçilib.

Qeyd edək ki, T.Abdullayeva həyat yoldaşı Barat Abdullayevin şikayəti əsasında saxlanılıb. Barat Abdullayev şikayətində bildirib ki, arvadı Təyminə Abdullayeva birgə nikahdan sonra əldə etdikləri yaşayış sahəsini satıb pulunu ələ keçirmək istəyib və bunu şəxsiyyət vəsiqəsini saxtalaşdırmaqla əldə edib. Onun sözlərinə görə, bundan sonra həmin sənəddən istifadə edərək qeyd edilən mənzili 250 min manata özgəninkiləşdirərək, ona 890 min manat məbləğində ziyan vurub.

Ərinin iddialarına cavab olaraq Təyminə Abdullayeva isə bildirib ki, metronun "Əhmədli" stansiyasının yaxınlığında yerləşən "Vesta" Gözəllik Salonunda Səkinə İsmayılova ilə tanış olub. Səkinə özünü gözəllik salonunun sahibi kimi təqdim edərək oranı T.Abdullayevaya 100 min dollara sata biləcəyini deyib. S.İsmayılovanın təklifi əsasında T.Abdullayeva evini girov qoyaraq "Faktor Lizing" MMC-dən kredit götürüb həmin obyekti almaq qərarına gəlib. Sənədlər imzalanarkən, aldadıldığını, müqavilədə evin MMC tərəfindən 250 min manata alınmasının və pulun yarısının Səkinənin ödəməsinin qeyd olunduğunu bilib. Buna görə də, digər sənədləri imzalamaqdan imtina edib. MMC bir neçə ay sonra T.Abdullayevaya pul ödəmədən evi S.İsmayılovaya satıb.

Onu da qeyd edək ki, Səbael rayon Məhkəməsində Barat Abdullayevlə Təyminə Abdullayevanın nikahın pozulması ilə bağlı məhkəmələri davam edir.

Telegramda izləyin

instagramda izləyin