Sumqayıtda bağçada 20 manata görə uşaqlara "KOTLET" verilmir: "CƏHƏNNƏMƏ ŞİŞSİNLƏR..." - FOTOLAR

Sumqayıtda yerləşən "Günəş" 11 nömrəli körpələr evi uşaq bağçası barədə məlumatlar dərc edilib. Belə ki, sözügedən körpələr evində valideynlərdən 20 AZN pul tələb olunması və bu pulun müqabilində isə körpələrə kotlet verilməsi qeyd olunmuşdu.

Məsələ ilə bağlı övladı "Günəş" 11 nömrəli körpələr evi uşaq bağçasında olan valideynlərdən biri ilə əlaqə saxladıq. Həmin valideyn də baş vermiş hadisənin təfərrüatını qeyd edərək faktı təsdiqlədi:

"Bəli, belə bir hadisə yaşanıb. Tək məndən yox, bütün valideynlərdən 20-25 manat pul istəyiblər. Uşaqlara xüsusi menyu ilə yemək verilməsi üçün 20 AZN pul istəyirlər. 5 manat da fond pulu istəyirlər. Siz təsəvvür edirsiniz ki, mən o pulu verməsəm, başqa biri versə, həmin adamın uşağı mənim uşağımın yanında oturub xüsusi menyuda yemək yeyəcək, mənim uşağıma isə kaşa yedizdirəcəklər? Bu birincisi insanlığa, ikincisi müsəlmanlığa, üçüncüsü də pedaqoqikaya sığan bir hərəkət deyil.

Xeyli müddət öncə bağçanın binasının təmiri üçün pul yığdılar, uşaqlarımız ordadır deyə dinmədik, verdik. Amma bu o demək deyil ki, hər gün bizdən pul istənməlidir. Bu lap qarğa ilə tülkünün təmsilinə oxşayır. Balanın birini ver, ağacını kəsəcəyəm. Biz valideynlər olaraq Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinə müraciət etdik. Bizə dedilər ki, siz bununla bağlı prokurorluğun özünə yazılı müraciət ünvanlamalısınız. Ona görə də bu gün biz Bakı Şəhər Baş Prokurorluğuna gedəcəyik.

Bundan öncə biz Sumqayıt Şəhər İcra Hakimiyyətinə müraciət etmişdik, lakin oradan bizim müracətlərimizə cavab gəlmədi. Müdirənin saytlara verdiyi açıqlamadan da belə başa düşdük ki, bu pul məsələsi elə İcra Hakimiyyəti orqanına bağlıdır. Ona görə də İcra Hakimiyyətindən bizi qane edəcək müsbət cavabın verilməsinə heç bir ümidimiz yoxdur. Bütün hüquqi addımlardan istifadə edərək biz məsələnin həllinə çalışacağıq. Müdirə bağçaya yeni təyin olunub. Valideynlərdən biri də onun yanına gedib, sonra heç kimi qəbul etmədi. Ona da deyib ki, uşaqlarınız cəhənnəmə şişsin. İndi bizi qəbul etmir ki, sözümüzü deyək. Bir qrupda 38 uşaq var, bütün valideynlər bəziləri istisna olunmaqla toplanıb bütün dövlət orqanlarına müraciətlər edəcəyik".

Məsələ ilə bağlı sözügedən "Günəş" 11 nömrəli körpələr evi uşaq bağçası ilə əlaqə saxlamağa çalışsaq da zənglərimizə cavab verilməyib.

Sumqayıt şəhər İcra Hakimiyyətinin rəsmi saytında isə strukturun qeyd olunmadığı üçün növbətçi hissə (+994 18 6559131) ilə əlaqə saxladıq. Oradan bizi İcra Hakimiyyətinin məsləhətçisi, Şuşa xanıma yönləndirdilər. Lakin o da (+994 18 6552905) bir neçə saat ərzində aramsız zənglərimizə cavab verib məsələyə aydınlıq gətirmədi.

Yaranmış problem diqqətimizdədir, yenidən ətraflı məlumatlar verəcəyik.

BiG.AZ

Telegramda izləyin

instagramda izləyin