Məmmədyarov yeni müavinindən daha az xarici dil bilir

Ləğv olunmuş Standartlaşdırma, Metrologiya və Patent üzrə Dövlət Komitəsinin keçmiş sədri Ramiz Həsənov xarici işlər nazirinin müavini vəzifəsinə təyin edilib.

Qeyd edək ki, Standartlaşdırma, Metrologiya və Patent üzrə Dövlət Komitəsi 20 aprel 2018-ci ildə Azərbaycan prezidentinin fərmanı ilə ləğv edilib.

Yeni nazir müavini Ramiz Həsənov diplomatiya sahəsinə yad deyil. Gürcüstan doğumlu 57 yaşlı Ramiz Həsənov 1978-1983-cü illərdə Moskva Dövlət Beynəlxalq Əlaqələr İnstitutunda təhsil alıb.

1983-cü ildən 1990-cı ilədək SSRİ Xarici Ticarət Nazirliyində işləyib.

1990-1992-ci illərdə Azərbaycan Respublikasının Nazirlər Kabineti yanında Xarici İqtisadi Əlaqələr Komissiyasında (1992-ci ildən Komitə) əmək fəaliyyətini davam etdirib.

1993-1997-ci illərdə Azərbaycan Respublikasının Xarici İqtisadi Əlaqələr Nazirliyində çalışıb.

1997-2004-cü illər ərzində Azərbaycan Respublikasının "Azərkontrakt" ASC Sədrinin 1-ci müavini vəzifəsində işləyib.

2004-2005-ci illərdə Azərbaycan Respublikasının Gürcüstandakı fövqəladə və səlahiyyətli səfiri olub.

2005-2018-ci illərdə Azərbaycan Respublikasının Standartlaşdırma, Metrologiya və Patent üzrə Dövlət Komitəsinin sədri vəzifəsində çalışıb.

Bununla da xarici işlər naziri Elmar Məmmədyarovun müavinlərinin sayı 6-ya çatıb. İndiyədək onun 5 müavini var idi: Araz Əzimov, Xələf Xələfov, Mahmud Məmmədquliyev, Hafiz Paşayev və Nadir Hüseynov

Beləliklə də, bu təyinatdan sonra xarici işlər naziri Elmar Məmmədyarov müavinlərin sayına görə yalnız fövqəladə hallar naziri Kəmaləddin Heydərovdan geri qalacaq. Belə ki, cənab Heydərovun hazırda 7 müavini var.

Maraqlıdır, bəs hazırda Xarici İşlər Nazirliyinin rəhbərliyindəki rəsmi şəxslərdən kim daha çox əcnəbi dil bilir. Modern.az saytı nazirliyinin rəmi məlumatları əsaslnda bunu araşdırıb.

Məlum olub ki, Elmar Məmmədyarov 3 xarici dil - ingilis, rus və türk dillərini bilir.

Nazir müavini Araz Əzimovun bildiyi 4 xarici dil var - ingilis, fars, rus və türk dilləri.

Nazir müavini Xələf Xələfov iki xarici dil bilir – alman və rus.

Digər 3 müavin Mahmud Məmmədquliyev, Hafiz Paşayev və Nadir Hüseynov da hərəyə iki xarici dil bilir - ingilis, rus dilləri.

Yeni nazir müavini Ramiz Həsənova gəldikdə, o, öz nazirindən daha çox xarici dildə danışır - ingilis, rus, türk və gürcü dilləri.

Modern.az

Telegramda izləyin

instagramda izləyin