Azərbaycana Gürcüstandan ucuz maşın gətirməyin ASAN YOLU

Bu ilin yanvar-aprel aylarında Azərbaycana xaricdən 5 310 ədəd avtomobil gətirilib.

Dövlət Gömrük Komitəsinin yaydığı hesabata görə, bu, ötən ilin eyni dövrü ilə müqayisədə 3 367 ədəd çoxdur. Avtomobillərin böyük hissəsi qonşu Gürcüstandan Azərbaycana gətirilib. Bunun isə çox da gizlin olmayan səbəbləri var. Əsas səbəblərdən biri Gürcüstanla Azərbaycanın ərazicə yaxın olmasını saymaq olar. Amma bu da tək səbəb deyil. Belə ki, Gürcüstanda digər ölkələrdən fərqli olaraq daha ucuz qiymətə avtomobil tapmaq olur. Hətta, sözügedən ölkənin Tiflis şəhərində azərbaycanlıların da çox getdiyi Rustavi maşın bazarı artıq Cənubi Qafqazda ən böyük avtomobil satış yeri kimi tanınmağa başlayıb. Elə həmyerlirlərimiz də ucuz maşın almaq istəyəndə bu ünvana üz tutur.

Gürcüstandan Azərbaycana gətirilən avtomobillərin sayında artımın olmasının başqa bir səbəbini isə "Azad Azərbaycan" radiosunun "Avtostop" verilişinin aparıcısı Tural Yusifov bildirdi.

O, Cebhe.info-ya açıqlamasında onu vurğuladı ki, Azərbaycana nə qədər çox avtomobil gətirilsə də bu əhali sayına görə azdır. Sözügedən məsələyə gəlincə isə T.Yusifov qeyd etdi ki, azərbaycanlılar əksər hallarda Gürcüstandan gətirdikləri avtomobili "rastomaşka" elətdirmir:

"Onlar ölkəyə gürcü nömrəsi ilə daxil olurlar. Azərbaycanda bir müddət sürürlər, sonra yenidən qayıdıb çıxırlar ölkədən. Bu zaman "rastamoşka" pulu vermirlər. "Avro 4" standartlarına uyğun avtomobillər alsalar, bunun "rastamoşka"sı onlara baha başa gələcək. Ona görə də, onlar ucuz başa gəlsin deyə 90 gündən bir giriş-çıxış edirlər. Bu da bizimkilərin Gürcüstandan daha çox avtomobil gətirməsini şərtləndirən amillərdən biridir".

Qeyd edək ki, bu ilin yanvar-aprel aylarında Azərbaycana gətirilən avtomobillərin 23 ədədi sürücü daxil olmaqla 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitələri, 4 785 ədədi əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələridir. Həmçinin 477 ədədi yük daşımaq üçün motorlu nəqliyyat vasitələri, 25 ədədi isə xüsusi təyinatlı motorlu nəqliyyat vasitələridir.

Telegramda izləyin