Bakıdakı "cərimə meydançası"ndakı yanğına görə DYP sərt tənqid edildi

Yol-nəqliyyat məsələləri üzrə tanınmış ekspert, hüquqşünas Ərşad Hüseynov iyunun 29-da Bakıdakı el arasında "cərimə meydançası" deyilən Dövlət Yol Polisinin (DYP) mühafizə olunan duracağında yanğının baş verməsi ilə bağlı sərt tənqidi fikirlər bildirib.

"Cərimə meydançası"nda baş vermiş yanğının 2 ciddi problemi bir daha qabartdığını qeyd edən ekspertin fikrincə, əvvəla duracaq lazımi səviyyədə mühafizə olunmayıb:

"Camaatın "cərimə meydançası" dediyi həmin yerin rəsmi adı "DYP-nin mühafizə olunan duracağı"dır. Bəli, mühafizə olunan. Amma təkcə avtomobillərin öz sahiblərindən mühafizə olunması mənasında yox, həm də sözün geniş mənasında, hərtərəfli mühafizə, o cümlədən yanğından mühafizə. Lakin hadisə yerindən çəkilən fotolardan görünür ki, oranı hətta ot-cəngəl basıb. İndiki 40 dərəcəlik istidə də həmin qurumuş otlara, sadəcə, söndürülməmiş siqaret kötüyü də bəs edir ki, belə yanğın olsun. Həmin meydançada nəinki asfalt örtük, hətta onun üstündə avtomobillərin duracağa qoyulma yerini bildirən xətlər və digər abadlaşma əlamətləri də olmalıydı. Özü də bunu etmək çətin deyil axı".

Ə.Hüseynov avtomobillərin çoxunun guya atılmış olması ilə bağlı bəhanələrə də münasibət bildirib: "Deyilir ki, yanan avtomobillərin çoxu sahiblərinin maraqlanmadığı, yəni atılmış avtomobillərdir. Amma yenə fotolardan görünür ki, orada yararlı və normal qiymətli avtomobillər də olub. Tutaq ki, orada, doğrudan da, sahiblərinin dalınca gəlmədiyi avtomobillər olub. Dünyanın hər yerində belə atılmış, faktiki sahibsiz avtomobillərin çıxdaş edilməsinin və utilizasiyasının dəqiq hüquqi mexanizmi var. Bizdə isə bu, hələ yada düşmür... Yəqin növbəti belə yanğın baş vermədən bu və digər problemlər həll edilər".

Qeyd edək ki, iyunun 29-da DYP-nin Bakı şəhəri, Nizami rayonu, Mikayıl Əliyev küçəsində yerləşən 11 saylı mühafizə olunan duracağında yanğın baş verib. İlkin məlumata görə, hadisə nəticəsində 50-yə yaxın avtomobil yanıb. Onların bəziləri tam, bəzilərinin isə bir qismi yanıb. Yararsız vəziyyətə düşən maşınlar arasında "BMW", "Niva" və "VAZ"lar da var.

FHN-nin rəsmi məlumatına görə isə, avtomobil dayanacağı kimi istifadə olunan ərazidə 3,7 ha quru ot və 51 ədəd müxtəlif markalı minik avtomobilinin (əksəriyyəti qəzaya uğramış və istismara yararsız vəziyyətdə olan) yanar hissələri yanıb. Ərazidə olan təxminən 200 ədəd müxtəlif markalı minik avtomobili və yaxınlıqdan keçən neft boru kəmərləri yanğından mühafizə olunub. Yanğın zamanı xəsarət alan olmayıb./milli.az

Telegramda izləyin