Nazirlikdən Şəhriyar Məmmədyarovun şikayətinə REAKSİYA: "220 min manat vəsait ayrılıb"

"Şəhriyar Məmmədyarov adını şahmat tarixinə iri hərflərlə yazmış şahmatçımızdır. Çox qürur hissi duyuruq ki , dünyanın 3 ən yaxşı şahmatçıları arasında Şəhriyarın adı yer alır. Şəhriyar yarışdadır. Onları anlayırıq. Ola bilər ki, həyəcan və narahatlıq onda müəyyən hissləri oyadıb və bu hisslər də ona bunları yazmağa vadar edib. Nə yazmasından asılı olmayaraq Şəhriyar bizim üçün önəmli şahmatçılardan biridir".

Bunu Modern.az-a açıqlamasında Gənclər və İdman Nazirliyinin mətbuat katibi Samayə Məmmədova dünya şöhrətli şahmatçı Şəhriyar Məmmədyarovun şəxsi "Facebook" səhifəsində şok açıqlamasına münasibət bildirərkən deyib.

Nazirliyin sözçüsü, tanınmış şahmatçının öz pulu hesabına yarışlara qatılması fikirlərinə də aydınlıq gətirib.

"Şəhriyarın yarışlara getməsinə gəldikdə isə Gənclər və İdman Nazirliyi tərəfindən il ərzində bu idman növünə 220 min manat vəsait ayrılıb ki, bu da şahmatçıların yarışa getməsinə, yol pulu və qidalanma, səfərləri nəzərdə tutulur. Heç bir şahmatçı qatıldığı beynəlxalq yarışlara (dünya və Avropa çempionatlarına) və yerli turnirlərə öz hesabına qatılmır. Hamısı nazirlik tərəfindən hərtərəfli təmin edilir və ediləcək də. Qarşıda bizi Batumidə keçiriləcək şahmat üzrə olimpiada gözləyir. Əminik ki, Şəhriyar orada da Azərbaycanı layiqincə təmsil edəcək. Unutmaq lazım deyil ki, cənab prezidentin ən çox diqqət ayırdığı idman növlərindən biri də şahmatdır. Şahmatçıların qarşılanması, onların həyat şəraitinin günbəgün yaxşılaşması üçün cənab prezident tərəfindən hər zaman diqqət ayrılır. Şəhriyara uğurlar arzulayır və onunla qürur hissi duyuruq"

Qeyd edək ki, Azərbaycanın məşhur şahmat qrossmeysteri Şəhriyar Məmmədyarov ABŞ-ın Sent-Luis şəhərində keçirilən "Sinquefield Cup" turnirinin VIII turunda hazırkı dünya çempionu, norveçli Maqnus Karlsenlə heç-heçə etdiyi görüşdən sonra şəxsi "Facebook" səhifəsində şok açıqlama yazıb. Şahmatçımız sponsoru olmadığını, yarışlara öz pulu hesabına getdiyini bildirərək, artıq yorulduğunu vurğulayıb.

Telegramda izləyin

instagramda izləyin