Azərbaycanla ticarət o qədər cüzidir ki, baş nazirin müavini rəqəmləri dilə gətirmədi...

Azərbaycanın iqtisadiyyat naziri Şahin Mustafayevin başçılıq etdiyi nümayəndə heyəti ikitərəfli iqtisadi layihələrlə bağlı danışıqlar aparmaq üçün Özbəkistanda səfərdədir. Virtualaz.org özbək KİV-lərinə istinadən xəbər verir ki, Özbəkistanın baş nazirinin müavini Elyor Qəniyev Şahin Mustafayevlə görüşdə ikitərəfli ticarət dövriyyəsinə dair rəqəmlərin cüzi olduğunu qeyd edib.

2018-ci ildə mal dövriyyəsi artıb, bu bizi sevindirir. Amma rəqəmlər çox kiçikdir. Mən mütləq şəkildə əminəm ki, bizim üçün ticarət əlaqələrinin inkişafı baxımından məhdudiyyətlər, limit yoxdur. Bu, ildə azı yarım milyard dollar, perspektivdə 1 milyard dollar ola bilər. Hələlik isə rəqəmlər çox kiçikdir. Mən, düzünü desəm, həmin rəqəmləri açıqlamaq da istəmirəm"-Qəniyev deyib.

Baş nazirin müavini bildirib ki, Özbəkistan bu gün fərqli ölkədir: açıq, şəffaf və əlçatan. Ona görə də bu yeni şərtlərdə Azərbaycanla əməkdaşlığa ümid edir. "Biz iqtisadiyyatın liberallaşması, investisiya mühitinin yaxşılaşdırılması üçün çox mühüm addımlar atmışıq, bunlar Özbəkistanda azərbaycan biznesi üçün yaxşı imkanlar yaradır"-Qəniyev əlavə edib.

Şahin Mustafayev isə görüşdə bunları deyib: "Təəsüf ki, biz mövcud potensialdan istifadə etməmişik. Ötən illərdə az iş görülməyib. Bizim hökumət etibarlı hüquqi baza yaradıb. Son ildə mal dövriyyəsinin artması yaxşıdır, amma baza rəqəmlər o qədər aşağıdır ki, mən də onları açıqlamaq istəmirəm. Amma deyə bilərəm ki, son ildə 50 faiz artım olub".

Qeyd edək ki, 2017-ci ildə Azərbaycanla Özbəkistan arasında ticarət dövriyyəsinin həcmi 31 milyon dollara yaxın idi.

Telegramda izləyin

instagramda izləyin