Ermənistan 30 ildə vurduğu ziyana görə nə qədər kompensasiya ödəyəcək? - AÇIQLAMA

"30 il müddətində Ermənistanın Azərbaycana vurduğu ziyan tək mənəvi deyil, maddi ziyanlarla da müşahidə olundu. Bu ziyan milyardlarla dollar vəsaitlə ölçülə bilər".

Bu sözləri Sonxeber.az- açıqlama verən iqtisadçı ekspert Elşad Məmmədov deyib.

O bildirib ki, Ermənistanın bizə ödəyəcəyi təzminat haqqında dəqiq rəqəmlər söyləmək çətindir:

"Bu təzminatın hesablanması üçün güclü tədqiqat aparılmalıdır. Dağıdılan binaların infrastrukturunun bugünkü qiymətlərlə hesablanması olduqca mürəkkəbdir. Burada söhbət maddiyatdan gedirsə, həmin dövr orada olan əsas dövriyyə vəsaitləri, kənd təssərüffatı infrastrukturu, bütünlükdə maddi dəyərə sahib olan hər şey qiymətləndirilməlidir. Etiraf etmək lazımdır ki, hazırkı dövrdə bizim bunu etməyimiz olduqca çətindir. Ona görə də hansısa dəqiq rəqəmlərdən danışmaq olmur. Amma şübhəsiz ki, dəymiş ziyan 10 milyardlarla dollarla ölçülə bilər.

Unutmaq olmaz ki, söhbət tək dəymiş ziyandan yox, 30 il ərzində qazanıla biləcək əlavə dəyərin itirilməsindən və müəyyən dərəcədə Ermənistan iqtisadiyyatında özünü göstərməsindən gedir. O ərazilərdə faktiki idarəetmə Ermənistan tərəfindən reallaşdırılırdı. Düzdür, Ermənistan orada iqtisadi sistem qura bilmədi, amma o ərazilərin Ermənistan iqtisadiyyatında payı var. Hesablamalar aparılan zaman da bunlar qeyd olunmalıdır.

Ona görə də Ermənistana qarşı hüquqi müstəvidə təzminat iddiası qaldırılmalıdır. Azərbaycan tərəfi bu prosesdə son nəticəyə qədər iştirak etməlidir. Burada ən mürəkkəb məsələ hüquqi müstəvidəki təmsilçilərin ikili standartlara bir çox hallarda yol verməsi, eləcə də prosesin ləngiməsinə görə çəkişmələrin olması və hesablamalardakı dəqiqliklə bağlı ola bilər. Bütün hallarda Azərbaycan sona qədər mübarizə aparmalı və Ermənistan tərəfindən təzminatı almalıdır".

Aytəkin Cəlali

Telegramda izləyin

instagramda izləyin