Çoxlarını "milyonçu" edən şəbəkə marketinqi-Fırıldaqçılar sadə insanları necə tora salırlar?
Yəqin ki, oturduğunuz yerdə qazanc əldə edəcəyinizlə bağlı mesajlar çoxunuza gəlib. Söhbət öz fırıldaqçılıq istedadlarını işə salaraq işə ehtiyacı olan insanların inamından sui-istifadə edən bəzi saxta şirkətlərdən gedir. Belə şirkətlər insanların sosial şəbəkə səhifələrinə standart mesajlar yazaraq işə cəlb etməyə çalışırlar. Heç bir yerə getmədən evdən idarə olunan və gün ərzində 4-5 saat vaxtını sərf edərək əldə olunan yüksək gəlir bir çox işsizləri təklif olunan işə həvəsləndirir. Amma nəticə heç də ürəkaçan olmur. Son zamanlar bu mövzu ilə əlaqədar çoxsayda şikayətlər də var. Hafiz Süleymanov adlı şəxs Sonxeber.az-a şikayət edərək bildirib ki, hadisə dostunun başına gəlib:
"Uzun müddət işsiz olan dostum 2-3 ay öncə yaxşı bir iş tapdığını və öz biznesini quracağını dedikdə söhbətin nədən getdiyini bildim. Onu çəkindirməyə çalışsamda "Junese Global" adlı şirkətdə işə başladı.Mən də dostumun işə başladığı həmin şirkətin facebook səhifəsindən nömrəsin götürüb zəng elədim. Söhbət əsnasında şirkətin əməkdaşına suallar verdim. Sizin Ədliyyə nazirliyindən lisenziyanız var? Səhiyyə Nazirliyində həmçinin bu işdən xəbəri var? Vergi ödəyirsiz? Sahibkarlıqla məşğul olduğunuza dair hər hansı sənəd, möhürünüz var? Lakin qarşı tərəf bütün bunlara ehtiyac olmadığını bildirdi. Onu da deyim ki, dostum işə başlayarkən ondan 400 azn pul alıblar. Yaxşı işlədiyi halda lisenziya alacaq və milyoner olacağına dair məlumat veriblər".
Sözügedən şikayətlə bağlı hüquqşünas Əlövsət Allahverdiyev Sonxeber.az-a açıqlama verib. O, bildirib ki, belə hallar dələduzların fürsətdən istifadə etməsi deməkdir:
"Bu şirkətlər vətəndaşların işə olan ehtiyaclarından yararlanırlar. Əlacı hər yerdən kəsilmiş insanlar adətən belə iş təkliflərini dəyərləndirib, onlarla işləmək qərarına gəlir. Lakin sözügedən şirkətlər bu vətəndaşlardan 10-20 azn sənəd düzəltmək adı ilə alıb, həmin insanları ziyana salırlar. Təkcə pul barədə yox, digər yollarla da aldadılmalar olur. Belə hallar baş verdikdə vətəndaşlar hüquq-mühafizə orqanlarını məlumatlandırmalıdır. Və belə şirkətlər və onların əməkdaşları, iştirakçıları cəzalandırılmalıdır. Çünki, onlar cinayətkar şəbəkə hesab olunur".
Lamiyə Məmmədova
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş