"Müxalifət ortalığa proqram qoysun, gedib küçədə camaatı narahat etməsin"-RƏY
Azərbaycanda növbədənkənar parlament seçkiləri rəsmən elan olunub. Fevralın 9-da ölkədə seçkilər keçiriləcək. Normalda siyasi qüvvələr artıq seçkilərə hazırlaşmalı idi. Lakin görünən odur ki, müxalifətin radikal qanadı boykot çağırışlarıan başlayıb. Xalqı seçkilərə deyil, kütləvi etirazlara, yüzminlik aksiyalara çağırır. Əslində seçki kampaniyası bütün siyasi qüvvələr üçün xalqla geniş təmas, ideya və planlarını xalqa təqdim etmək üçün ən ideal fürsət olduğu üçün normalda müxalifət qüvvələri seçkilərə gedir, çünki istənilən halda seçkidə iştirak boykotdan daha effektivdir. Lakin görünən odur ki, ənənəvi radikal müxalifət cəmiyyətə yeni heç nə vəd eləmir. Son aylarda ölkə siyasətindəki dinamikanın fonunda Milli Şura və ya digər müxalif təşkilatlar yalnız aksiya keçirmək təşəbbüsü ilə gündəmə gəlib və bu zaman heç bir yeni, hazırkı şərtlərlə ayaqlaşan şüarlar təklif edə bilməyib.
Mövzu ilə bağlı politoloq Mübariz Əhmədov Sonxeber.az-a bildirib ki, müxalifət haqqında çox da kəskin söz işlətmək istəmir. Amma təəssüf edir ki, onlar özləri öz hərəkətlərini dərk etmək imkanından da məhrum olurlar.
"Dünya demokratiya alemində qəbul olunmuş bir tezis var, hətta ən pis seçki məcəlləsi ilə demokratik seçki keçirmək olar, əsas xalqın əhval-ruhiyyəsidir. Hətta ən yaxşı seçki məcəlləsi ilə də çox axmaq demokratik seçki keçirilə bilər. Yəni, seçkini müəyyən edən seçki məcəlləsi deyil, seçkini müəyyən edən seçki iştirakçılarının aktivliyidir. Çox təəssüf ki, bizim müxalifətin liderləri bu günə qədər bunu başa düşməyiblər. Azərbaycan cəmiyyətinin ən böyük qüsuru indiki müxalifətdir. Əgər müxalifət indikindən biraz fərqli olsaydı, cəmiyyətdə, elə iqtidarın da fəaliyyətində çox proseslərdə yeniliklər olardı. Ona görə mən belə başa düşürəm ki, ən gözəli bu seçkilərdə yeni dünyəvi müxalifətin meydana çıxmasıdır. Əgər fikir verdinizsə, ölkə prezidenti BDU-nin 100 illik yubiley tədbirində, çıxışında qeyd etdi ki, ölkəyə lazım olan normal müxalifətdir, təklif verən, düşündürən, yol göstərən, yeri gələndə tənqid edən, yoxsa vurub-dağıdan müxalifət heç bir dövlətə lazım deyil. Xüsusilə Azərbaycan kimi həssas bir məkanda yerləşən dövlətə ümumiyyətlə belə müxalifət lazım deyil", - deyə politoloq vurğulayıb.
"Deyə bilərsinizmi ki, hansısa bir müxalifətin öz siyasi partiyası ilə bağlı bir kitabı, elmi əsəri, elmi məqaləsi varmı? Yox, yoxdur.
Yəni, bunlar ancaq küçə yürüyüşünə hazırlaşıblar, adamların çox olduğu yerlərdə olsunlar, bir-iki şüar səsləndirsinlər və öz adamları da elə mövqedə dayansın ki, guya xalq bunları dəstəklədiyi kimi görünsün.
Ötən ilki prezident seçkisini götürün,orada bütün dairələri, məntəqələri izləyin, görəcəksiniz ki, nə qədər adam hansı namizədə səs verir. Səslər də MSK tərəfindən olduğu kimi də qeydə alınıb. İqtidar partiyasının bacarığı adamı seçkiyə gətirib və özünə səs verməkdir. İqtidar və ya iqtidarın partiyası müxalifətin bazasının səsini özünə yazdırmaqla özünə səs artırmır, camaatı seçkiyə cəlb etməklə bu işi görür. Müxalifət də buyurub gəlsin, proqram ortalığa qoysun, daha gedib küçədə camaatı narahat etməsin.
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş