"20 Yanvar xalqımızın azadlığı uğrunda mübarizəsinin şanlı və parlaq səhifələrindən biridir"-Əli Əhmədov

Bir neçə gündən sonra Azərbaycan tarixinin ən qanlı faciələrindən olan "20" Yanvar qırğınının 30 ili tamam olur.
Sonxeber.az-ın məlumatına görə, bunu YAP-ın icra katibi və partiya sədrinin müavini Əli Əhmədov hakim partiyanın 20 yanvar faciəsinin 30 illiyinə həsr edilmiş tədbirində deyib.
"Azərbaycanın hər bir guşəsində bu tarix qeyd edilir və şəhidlər yad edilir. Yeni Azərbaycan Partiyası da bugünkü toplantısında məhz bu hadisənin 30-cu ildönümünü qeyd etmək istəyir. Onu ayrıca vurğulamaq istəyirəm ki, 30 il bundan əvvəl törədilən, sadəcə olaraq Azərbaycan xalqının başına gətirilən faciə deyil, bu xalqımıza qarşı törədilmiş böyük qanlı bir cinayət idi. Təbii ki, bu cinayəti törədən də o zamankı Sovet İmperiyası və Sovet İmperiyasının rəhbərliyində duranlar idi. Çox təəssüf hissi ilə qeyd eləmək lazımdır ki, tarixdə törədilən cinayətlərə görə cavab verilməməsi hallarına demək olar ki, rast gəlmək mümkün deyildir.Yəqin ki, 20 Yanvar faciəsi və qırğını yeganə haldır ki, bu faciəni və qırğını törədənlərin heç biri bu günə qədər öz cəzasını almayıblar. Nə bu qırğının törədilməsinə əmr verənlər, nə də onun müxtəlif səviyyədə vəzifə daşıyaraq icra edənlər cəzalandırılmayıblar. Məmnunluq hissi ilə qeyd eləmək lazımdır ki, Azərbaycan xalqının Ümumilli Lideri Heydər Əliyev faciənin törədilməsinin növbəti günündə bu faciənin əsl baiskarını və səbəbkarını, o zamanlar Sovetlər İttifaqına rəhbərlik edən Qorbaçovu ciddi şəkildə ittiham etdi, bu faciəyə qiymət verilməsi tələbini irəli sürdü. Hesab edirəm ki, biz 30 il bundan əvvəl törədilən faciəni sadəcə olaraq Azərbaycan xalqının tarixinin hüzn günü kimi qeyd etməli deyilik. Bu, Azərbaycan xalqının öz azadlığı uğrunda mübarizəsinin şanlı və parlaq səhifələrindən biridir. 30 il ötüb. Bu gün Azərbaycan müstəqil dövlətdir. Həmin faciə törədiləndən təxminən bir il sonra Sovet İmperiyası çökdü və Azərbaycan da öz müstəqilliyinə qovuşmuş oldu. Bu gün biz ayrıca onu vurğulayırıq ki, Azərbaycanın müstəqillik qazanmasında, öz müstəqil inkişaf yolunu seçməsində 20 Yanvar faciəsi zamanı öz canlarını qurban vermiş insanlarımızın da əməkləri var. Təbiidir ki, biz bugünkü müstəqilliyimizi, bugünkü inkişafımızı və gələcəyə ümidimizi qiymətləndirərkən eyni zamanda bu yolda tökülən qanları və bu qanların sahiblərini də xatırlamalıyıq. Azərbaycan xalqı 20 yanvar faciəsini və onun qurbanlarını heç vaxt unutmur, unutmayacaq. Bu bizim müstəqillik yolunda verdiyimiz itkilərdir. Amma əldə etdiyimiz müstəqillik və həmin müstəqilliyin Azərbaycanın hər bir vətəndaşına, bütünlüklə dövlətimizə gətirdiyi üstünlüklərdir", - deyə Əli Əhmədov bildirib.

Telegramda izləyin

instagramda izləyin