"Rusiya kürdlərə Yaxın Şərq regionunda dövlət qurmağa imkan verməyəcək"-RƏY

Suriyanın şimalında fəaliyyət göstərən kürd silahlı qrupları, o cümlədən YPG Suriya mərkəzi hökumətindən dəstək istəyib.
Suriyanın al-Vatan qəzetinin yazdığına görə, YPG nümayəndələri Raqqa şəhəri yaxınlığında yerləşən Tabqa hərbi hava bazasında Suriya ordusu nümayəndələri ilə görüşüb. Qəzet yazıb ki, YPG nümayəndələri hökumətdən Raqqa əyalətinin Ayn əl-İsa məntəqəinə hərbi qüvvə göndərməsini və eləcə də YPG-yə silah yardımı etməsini istəyib.
Bununla da kürdlər Türkiyə ordusu və Ankaranın dəstək verdiyi müxalifət güclərinin təzyiqi qarşısında kürdlər Dəməşqlə yaxınlaşmağa çalışır. ABŞ-ın ötən ilin payızında Türkiyənin kürdlərə qarşı əməliyyatına dəstək verməsindən sonra yalnız qalan kürdlər bu dəfə Dəməşq hökumətinə sığınır. Burada Rusiyanın da təsiri var.
Ankaranın hərbi gücü qarşısında təklənən kürdlərin Dəməşqə sığınması gözlənilən idi?

Mövzu ilə bağlı politoloq Mübariz Əhmədoğlu Sonxeber.az-a danışıb. O, bildirib ki, 6 ildir bu məsələ faktiki olaraq müstəvidədir:
"Suriyada vəziyyət gərginləşəndən bir-iki il sonra demək olar ki, kürdlərin mövqeyini hər iki tərəf öyrənməyə cəhd etdi. Həm Dəməşq, həm də ABŞ öz mövqeyini saxlamaq üçün ardıcıl surətdə addımlar atdı. Məhz kürdlərin ABŞ üçün vacib olduğu amilinə görə ABŞ, hətta Türkiyə kimi uzun müddətli və vacib müttəfiqinin sözünə qulaq asmadı. Bilirsiniz ki, qısa bir müddət ərzində kürdlərə 1500 maşın silah verdi və indi də ABŞ kürdləri müdafiə edir. Amma artıq kürdlər görürlər ki, Suriya ordusu irəliləyir. Yəni, Rusiyanın dəstək verdiyi Suriya ordusu yaxın zamanlarda Trakiyaya yaxınlaşacaq. Bu vaxt kürdlər artıq Suriya hökumətinə düşmən kimi görünmək istəmirlər. Çünki Rusiyanın dəstəklədiyi rəsmi Dəməşq ordusunun kürdləri əzə biləcək gücü var. Ona görə kürdlər yenidən manevr etməyə başlayıblar. Afrin və İdlib əməliyyatlarından qabaq da kürdlərin mövqeyi çox həlledici oldu. Kürdlər hər iki tərəfə müraciət etdi. O zaman kürdlər Rusiyanın, Dəməşqin xeyrinə seçim etsəydilər, Rusiya Türkiyəni İdlibə buraxmayacaqdı. Sadəcə kürdləri qorxutmaqdan ötrü Rusiya Türkiyəni İdlibə və Afrinə buraxdı. İndi də kürd başbilənləri bu kartı aktivləşdiriblər ki, ortada əzilməsinlər. Amma elə başa düşürəm ki, kürdlər hələ uzun müddət ABŞ-ın mövqeyində qalacaqlar. Çünki Rusiya kürdlərə bu regionda dövlət verə bilməz. Amma ABŞ-ın kürdlərə bu regionda dövlət vermək, dövlət yaratmaq niyyəti var və ən azı İraq Kürdüstanının muxtar regiona çevrilməsi ABŞ-ın planının nəticəsi idi. Ona görə kürdlər hazırda manevr edərək Dəməşq ordusunun hücumundan yayınacaqlar və müəyyən qədər danışıqlara gedə bilərlər. Amma sonda strateji olaraq kürdlərin seçimi ABŞ tərəfi olacaq".

Fəridə Ağazadə

Telegramda izləyin

instagramda izləyin