"Avropada islamofobiya yenidən alovlanıb"- Politoloq RƏYİ

Almaniya polisi bir neçə əyalətdə eyni vaxtda əməliyyat keçirərək "Der harte Kern" radikal sağçı qrupun üzvlərini həbs edib. Saxlanılan 12 nəfər ölkədəki məscidlərə hücum hazırlayırmış.Fevralın 20-də isə Almaniyanın Hanau şəhərində iki qəlyan kafesinə həyata keçirilən hücum zamanı 9 nəfər öldürülüb. Terror hücumunu həyata keçirən Tobias R və anası evində ölü tapılıb. Almaniya hüquq-mühafizə orqanları hücumçunun radikal irqçi olduğunu açıqlayıb.Baş nazir Angela Merkel hücumun irqçi olduğunu bildirib və irqçiliyi "zəhər" adlandırıb.Ötən gün Londonda da məcscidə hücum olub. Bıçaqla silahlanmış terrorçu ibadət hazırlığı vaxtı qəfildən məscidin müəzzininə hücum edərək onu yaralayıb. Son iki gündə baş verən hücumlar və eləcə də hücum cəhdləri Avropada artan islamofobiya və radikal sağın güclənməsi əlaməti kimi qiymətləndirir.

Bununla bağlı Sonxeber.az-a danışan politoloq, "Atlas" Araşdırmalar Mərkəzinin rəhbəri Elxan Şahinoğlu bildirib ki, İslamofobiya Avropada yenidən genişlənib: "Almaniyadakı son hadisələr və Böyük Britaniyadakı böyük cinayətlər ondan xəbər verir ki, əslində Avropa dövlətləri İslamafobiya ilə ciddi mübarizə aparmırlar. Almaniyadakı son hadisə daha dəhşətlidir. Öldürülən 10 nəfərin 5-i türkdür. Əvvəllər də belə hadisə olurdu. Almaniyada hansısa binanı yandırır, türklər qətlə yetirilirdi. Bəzən cinayətkar mühakimə ediliblər. Bu gün atmosfer elədir ki, gəlmələrə qarşı nifrət var. Almaniyada miqrantların əleyhinə qurulan partiya artıq çox böyük nüfuza sahib olaraq parlamentdə özünə yer qazanıb. Böyük Britaniyanın Avropa İttifaqını tərk etməsində əsas səbəb elə hu qaçqınlarla bağlı idi. Çünki Böyük Britaniya rəhbərliyi istəmir ki, 3-cü dövlətdən kimlərsə onun ölkəsinə gəlib, yerləşsin. Amma buna baxmayaraq görürük ki, Böyük Britaniyada belə hadisələr olur. Məscidlərə hücumlar edilir, türklər öldürülür. Buna baxmayaraq Almaniya Kansleri Angela Merkel çıxışların birində açıq etiraf etdi ki, onun ölkəsində multikultralizm alınmadı. Müxtəlif xalqların bir-birini anlaması və inteqrasiyası baş tutmadı. Hazırda Almaniyada 3 milyona yaxın türk yaşayır. Onlar ikinci dünya müharibəsindən sonra oraya özbaşına getməyib. Almaniyanın işçi qüvvəsinə ehtiyacı var idi. Türklər Almaniyaya fəhlə kimi gedib, orada müxtəlif işlərdə çalış o ölkənin inkişafı üçün əziyyət çəkiblər. Amma buna baxmayaraq, görürük ki, Almaniyada türklərə ikinci növ vətəndaş kimi baxırlar".

Aysel Yusifqızı

Telegramda izləyin

instagramda izləyin