"Azərbaycan Polisi Birinci Qarabağ döyüşlərində ön sıralarda olub"-RƏY

İyulun 2-də Azərbaycan Polisi yaranmasının 102-ci ildönümünü qeyd edir. Ümummilli lider Heydər Əliyevin 1998-ci ildə imzaladığı Fərmanla iyulun 2-si Azərbaycan Polisi Günü elan olunub.

Bu tarixi gün ilə bağlı deputat Azər Badamov Sonxeber.az-a danışıb.
Deputat bildirib ki, Azərbaycan polisinin yaranma tarixinə nəzər saldığımız zaman 102 il əvvələ qayıtmalı oluruq:

"1918-ci ildə Azərbaycan Xalq Cümuhuriyyəti yarananda Daxili İşlər Nazirliyi tərkibində polis yaradılıb. Müstəqilliyimiz 70 il əlimizdən alınsa da yenidən qurulmuş müstəqil Azərbaycan Respublikası AXC-ni Azərbaycan Respublikasının siyasi varisi hesab etmiş və yaradılan yeni dövlət orqanlarının yaranma tarixlərini 1918-ci ildən hesablanmağa başlanıb. Belə bir yanaşma əslində dövlətimizin tarixini müəyyən edir və böyük dövlətçilik tarixinə malik bir ölkədə yaşamaqla hər bir vətəndaşa qürur hissi yaşadır. Azərbaycan Respublikasının ikinci müstəqillik tarixi 1991-ci ilə təsadüf olunmasına baxmayaraq polislərlə bağlı ən düzgün yanaşmanı Heydər Əliyev edib. 24 may 1998-ci il 710 nömrəli Fərmanı ilə Azərbaycan Polisi Gününün tarixi dəyişdirilmiş, 1918-ci ildə Azərbaycan Demokratik Respublikası Daxili İşlər Nazirliyinin tərkibində ilk polis orqanlarının təsis edildiyi gün — 2 iyul Azərbaycan Polisi Günü elan edilmişdir. Həmin vaxtdan Azərbaycanda hər il 2 iyul tarixi Azərbaycan Polisi Günü kimi qeyd edilir.
Azərbaycan Polisi Birinci Qarabağ döyüşlərində ölkəmizin ərazi bütövlüyü uğrunda ön sıralarda dayanmış, 500-dən çox polis əməkdaşı şəhid olmuş, 1710-dən çox adam yaralanmışdır. Ölkədə siyasi sabitliyin təmin olunmasında müxtəlif hərbi birləşmələrə, cinayətkar ünsürlərə qarşı inamla mübarizə aparmış, dövlət quruluşunun möhkəmlənməsində yaxından iştirak edərək fədakarcasına çalışmışdır. Azərbaycan Polisi dövrün çağırışlarına cavab verən fəaliyyəti təqdim edə bilən xalqın rəğbətini qazanmış bir dövlət orqanına çevrilmişdir. Fevral ayından elan olunmuş qlobal pandemiya şəraitində koronavirusa qarşı effektiv mübarizə tədbirləri çərçivəsində tətbiq olunmuş karantin rejimində Azərbaycan polisi 24 saat iş başındadır. Karantin rejiminin tələblərinin yerinə yetirilməsində gecə - gündüz xidmətdə dayanaraq ölkədə ictimai asayişin təmin edilməsində polisimiz əsl qəhrəmanlıq göstərir. Xüsusilə cəmiyyətin infeksiya təhlükəsi ilə üzləşdiyi bir dövrdə ailələrindən uzaq düşərək öz həyatlarını risk altına ataraq polisimiz xalqımıza sədaqətlə xidmət edir. Bu gün Azərbaycan Polisi günüdür. Bu bayram günü münasibətilə Daxili İşlər naziri cənab Vilayət Eyvazov başda olmaqla bütün polis əməkdaşlarını təbrik edir, can sağlığı və fəaliyyətlərində uğurlar arzulayıram".

F.Ağayeva

Telegramda izləyin

instagramda izləyin