Sülhməramlıların sayı niyə gün-gündən artır? - Deputatdan AÇIQLAMA

Azərbaycanın Qarabağ bölgəsində müvəqqəti yerləşdirilmiş Rusiya sülməramlıları, üçtərəfli 10 noyabr bəyənatına zidd olaraq, bölgəyə 1960 hərbçi deyil, 8 minə yaxın sülhməramlı qüvvələrə xidmət edən hərbi-tibbi personalın dislokasiyasını təmin ediblər

Məsələ ilə bağlı Sonxeber.az saytına açıqlama verən deputat Bəhruz Məhərrəmov bildirib ki, sülhməramlıların Qarabağ bölgəsində qalma müddəti 5 ildir:

"Rusiya müharibə dövründə müttəfiqi Ermənistana fasiləsiz yardım etsə də, Azərbaycana münasibətdə neytrallığını qorudu, habelə ərazi bütövlüyümüzə dəstəyini ifadə etməklə beynəlxalq hüquqa da hörmətlə yanaşdı. Cənab Prezidentin də dəqiq ifadə etdiyi kimi, Rusiya Ermənistanın müttəfiqi, bizim isə qonşumuzdur. Bu mənada biz rəsmi Moskvadan daha artığını heç gözləyə də bilməzdik. Ona görə bu mövqe bizi qane etdi. Nəticə etibarı ilə, Azərbaycan cəmiyyəti də, dövləti də, 10 noyabr bəyanatının şərti kimi, Rusiya sülhməramlılarının Azərbaycanın beynəlxalq hüquqla tanınan ərazisində 5 il müddətinə müvəqqəti olaraq yerləşdirilməsinə dözümlü yanaşdı. Etiraf edək ki, bu dövr ərzində də bir neçə dəfə Rusiya prezidenti tərəfindən Azərbaycanın ərazi bütövlüyü ilə bağlı mühüm və ədalətli bəyanatlar verilib. Lakin, təəssüf ki,  sülhməramlıların fəaliyyətində biz eyni ədalətli siyasi xəttin inikasını nəinki görmədik, hətta separatizmi proteksiya etməklə Azərbaycan ərazisində müvəqqəti yerləşdirilmiş rus birləşməsinin "sülh məramı" şübhə doğurmağa başladı. Əvvəlcə Azərbaycandan icazəsiz "humanitar" fəaliyyət, daha sonra separatçılarla müxtəlif birgə tədbirlər, eyni zamanda qanunsuz silahlı dəstələrin mövcudluğuna və Azərbaycan mövqelərini atəşə tutmasına göz yumulması məzmunlu çoxsaylı faktlar təkrarlanmağa başladı. Hətta mediada yayılan məlumatlara istinad etsək, bu günlərdə Azərbaycana üz tutmaq istəyən erməni ailəsi ilə aparılan "profilaktik söhbət"lə sülhməramlıların, öz mahiyyətlərinin əksinə, sülh və etimad mühitinə zərbə vurduqları qənaəti yaranır.

"Əlbətdə, bu cür fəaliyyət Azərbaycan tərəfini qane edə bilməz. İndi onların sayı ilə bağlı 10 noyabr bəyanatının şərtlərinin pozulması ilə bağlı yeni bir məsələ ictimai müzakirədədir. Bu faktın nə qədər həqiqətə əsaslandığını deyə bilmərəm, amma, açığı kontingentin bəyanatın 3-cü maddəsində müəyyən olunmuş saya uyğunluğuna mən də skeptik yanaşıram. Belə şübhələrin meydana çıxmasına sülhməramlıların bugünəqədərki fəaliyyəti kifayət qədər əsas verir. Lakin unutmamalıyıq ki, istənilən halda, 4 il sonra sülhməramlıların Azərbaycan ərazisində qalıb-qalmayacağı qərarını vermək rəsmi Bakının suveren hüququdur. İndi bəzi məqsədli adamlar cəmiyyətin beyninə yeritməyə çalışırlar ki, sülhməramlıların çıxması üçün Ermənistan da razılıq verməlidir. Amma əsla belə bir şey yoxdur. 10 noyabr Bəyanatının 4-cü maddəsində açıq mətnlə yazılıb ki, sülhməramlı kontingentin qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyəti ilə bağlı tərəflərdən hər hansı biri çıxış etməzsə, müddət avtomatik olaraq növbəti 5 ilə uzadılır. Belə ki, burada tərəflərdən birinin, yəni Azərbaycanın, xitam niyyəti kafidir. İkincisi, bu maddədə "tərəflər" ifadəsi Ermənistanı yox, Rusiya və Azərbaycanı ehtiva edir".

Deputat onu da vurğulayıb ki, sülhməramlılar Ermənistan-Azərbaycan sərhədində yox, Azərbaycanın suveren ərazisində müvəqqəti yerləşiblər və Ermənistanın bizim ərazilərimiz daxilində hər hansı proseslə bağlı söz hüququ ola bilməz:

"Bu mənada "tərəflər" dedikdə Azərbaycan və Rusiya nəzərdə tutulur. Necə ki, ərazi sahibi kimi, bizim sülhməramlıları 5 ilin tamamında çıxartmaq hüququmuz var, eləcə də biz istəsək belə, sülhməramlı kontingent sahibi kimi, Rusiyanın da burada daha 5 il qalmamaq, yəni müddət bitən kimi çıxmaq hüququ var. Yəni sülhməramlı meyarı müvəqqətidir. Sülhməramlı komandanlıq, eləcə də Rusiyanın bəzi dairələri bunu zamanında başa düşməlidir. Əks halda, Rusiya kimi bir dövlət bölgədə nüfuzunu və çəkisini əhəmiyyətli dərəcədə itirə bilər".

Rafi Müslümov

Telegramda izləyin