Azərbaycan xalqı ilə qonşuluq münasibətində yaşamağı ermənilər də öyrənməlidirlər

Hər zaman prinsipiallıq, yenilməz iradə nümayiş etdirərək ölkəmizin milli maraqlarını qətiyyətlə müdafiə edən Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə rəşadətli Ordumuz tərəfindən 44 günlük Vətən müharibəsində şanlı Qələbə qazanılaraq 30 ilə yaxın işğal altında olan torpaqlarımızın qəsbkar erməni işğalından azad edilməsindən sonra xalqımız və dövlətimizin qarşısında yeni məsul vəzifə dayanır ki, bu, işğaldan azad edilmiş tarixi və əzəli torpaqlarımızda quruculuq, bərpa işlərinin aparılması, yenidən Qarabağa həyatın qaytarılmasıdır.
Artıq dövlətimiz bu istiqamətdə genişmiqyaslı işlər görür, əcnəbi şirkətlərlə birgə yeni iqtisadi, quruculuq layihələri hazırlanır, infrastrukturun bərpası ilə bağlı bir çox ilkin tədbirlər həyata keçirilir. Müharibədən sonra azad olunmuş ərazilərə ölkə başçısının mütəmadi səfərlər etməsi isə quruculuq və bərpa işlərinin daha operativ və effektiv şəkildə davam etdirilməsini təmin edir.
Bu gün cənab Prezident İlham Əliyevin rəhbərliyi və qətiyyəti ilə bu ərazilərin bərpası istiqamətində həyata keçirilən işlər və tədbirlər, atılan addımlar Qarabağın cənnətə çevirilməsinə hədəflənib. Tezliklə bu bölgənin sürətli inkişafına və ən qabaqcıl standartlara uyğun yenidən bərpa ediləcəyinə nail olunacağı, orada yaşayacaq əhalinin rifahı üçün bütün lazımi tədbirlərin görüləcəyi şübhəsizdir.
Lakin məsələ burasındadır ki, Azərbaycanla Ermənistan arasında sərhədlərin delimitasiya və demarkasiyası işlərinin aparılması prosesini düşmən ölkə bütün mümkün vasitələrlə əngəlləməyə, təxirə salmağa çalışır. Onların kəşfiyyat-diversiya qrupları sərhədimizi keçərək ərazimiz daxilində mina işlərini aparmağa və təxribat əməllərini törətməyə cəhd göstərir. Məqsəd isə bəllidir: mümkün qədər çoxlu sayda insanın həlak olmasına nail olmaq, bu ərazilərə azərbaycanlıların qayıdışını maksimum uzatmaq.
Onsuz da, qarşı tərəfin məqsədli şəkildə vaxtı ilə işğalda saxladığı bütün əraziləri, hətta hərbi təyinatı olmayan sahələri belə minalaması həm hərbçilərimiz, həm də mülki insanlarımız üçün təhlükə olaraq qalmaqdadır.
Müharibələr tarixinin ən acınacaqlı məqamlarından biri mülki şəxslərin minalardan əziyyət çəkməsidir. Beynəlxalq təcrübə onu göstərir ki, münaqişələr bitdikdən sonra əksər hallarda gələcəkdə mülki əhalinin zərər çəkməməsi üçün minalı sahələrin xəritələri qarşı tərəfə təqdim edilir. Tarixən həmişə müharibə aparan tərəflər arasında hərbi əməliyyatlar bitən zaman danışıqlara əməl olunmuş və öhdəliklər dinc formada yerinə yetirilmişdir.
Müharibədən sonra düşmən ölkə minalanmış sahələrlə bağlı xəritələri Azərbaycana təhvil verməli idi. Lakin Ermənistan belə bir niyyət nümayiş etdirmirdi. Dünya hərb və sülh tarixində isə bu cür ifratçı davranışlara çox nadir hallarda rast gəlinir. Ermənistanın kapitulyasiyasından 7 aydan artıq zamanın keçdiyi müddət ərzində işğalçı ölkənin hər hansı bir hərbçisi və ya vətəndaşı minaya düşərək həlak olmayıb. Deməli, minaların koordinatları qarşı tərəfdə mövcuddur.
12 iyun 2021-ci il tarixdə Ermənistanın Ağdam rayonu üzrə 97 min tank və piyada əleyhinə minanı özündə əks etdirən xəritələri Azərbaycan tərəfinə təqdim etməsi müqabilində, saxlanılan 15 nəfər erməni Azərbaycan-Gürcüstan sərhədində Ermənistana təhvil verməsi mina xəritələrinin Ermənistanda mövcudluğunun növbəti sübutu oldu. Bu hadisə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə aparılan diplomatiyanın növbəti parlaq qələbəsi kimi tarixə yazıldı və xeyli sayda vətəndaşımızın həyatının xilas olmasını özündə ehtiva etməklə yanaşı, həm də Ağdam rayonunun ərazisində aparılan bərpa-quruculuq işlərinin surətləndirilməsinə və məcburi köçkünlərin öz dədə-baba torpaqlarına daha tez bir zamanda qayıtmasını şərtləndirəcəkdir.
Digər işğaldan azad edilmiş torpaqlarımızda basdırılan minaların xəritələrinin verilməsi üçün də beynəlxalq qurumlar və dünyanın aparıcı ölkələri Ermənistana ciddi təzyiq göstərməli, dövlət sərhədində delimitasiya və demarkasiya işlərinin getdiyi bir dövrdə hər hansı bir təxribat-diversiya əməllərinin törətməməsi üçün işğalçı ölkəyə davamlı çağırışlar etməlidirlər.
İkinci Qarabağ müharibəsi başa çatdıqdan sonra, indi verilən başlıca suallardan biri budur ki, Azərbaycan və erməni icması Qarabağda birgə yaşaya biləcəkmi?
Azərbaycan Ermənistandan fərqli olaraq monoetnik dövlət deyil, cəmiyyətimizdə bütün etnoslara, bütün dinlərə münasibət eynidir. Tolerantlıq xalqımızın bugünkü nailiyyəti yox, tarix boyu formalaşmış davranış tərzidir. Dağlıq Qarabağ bölgəsində yaşayan ermənilər də bir gün onların yeganə yolunun Azərbaycan xalqı ilə qonşuluq münasibətində yaşamaq olduğunu başa düşəcəklər.
Azərbaycan Prezidenti İlham Əliyev çıxışlarında dəfələrlə bildirib ki, Azərbaycan vətəndaşı olan dinc ermənilərin Qarabağda azərbaycanlılarla birgə yaşaması üçün heç bir problem yoxdur. Onlar da Azərbaycanın bərabərhüquqlu vətəndaşları ola bilərlər. Bu isə onların hüquqlarının və təhlükəsizliklərinin qorunmasına ən yüksək səviyyədə təminatdır.
Amma, Azərbaycan tərəfi öz erməni vətəndaşlarına birgə yanaşı yaşamaq üçün ən yüksək səviyyədə təminat verdiyi halda ermənilər qarşıdurma yaradırlar. Ermənistanda baş qaldıran revanşist qüvvələr yenə də ölkəmizə qarşı ittihamlarla çıxış edərək, Azərbaycanı təxribatlarla, növbəti müharibə ilə hədələməyə, ən müxtəlif şəkildə Azərbaycana ziyan vurmağa çalışırlar. Bütün bunlar isə o deməkdir ki, Ermənistan hələ də Azərbaycanın ona endirmiş olduğu ağır, ölümcül zərbədən nəticə çıxarmayıb.
Amma bütün bunlar əbəsdir. Müzəffər Ali Baş Komandan İlham Əliyev Laçın rayonunda olarkən bəyan etdi ki, "Biz hər şeyə nəzarət edirik və heç vaxt imkan verə bilmərik ki, erməni faşizmi bir daha başını qaldırsın". Ona görə də, erməni tərəfi başına gələnlərdən ibrət dərsi götürməli, Azərbaycanın ona endirdiyi ağır zərbədən nəticə çıxararaq Azərbaycan xalqına düşmən mövqeyindən əl çəkməlidir.

Telegramda izləyin

instagramda izləyin