"Pandemiya dövründə dəmir yolu ilə daşınan yüklərdə azalma yoxdur" - Babək Əliyevlə MÜSAHİBƏ

"Azərbaycan Dəmir Yolları" QSC-nin Yükdaşımaları departamentinin rəis müavini, Yük və Kommersiya xidmətinin rəisi Babək Əliyev Sonxeber.az-a müsahibə verib.

Həmin müsahibəni oxuculara təqdim edirik:

- Son 1 il ərzində həyata keçirilən layihələr haqqında danışardınız.

- "Azərbaycan Dəmir Yolları" QSC-nin son illər ərzində həyata keçirdiyi mühüm layihələrdən biri Bakı-Tiblisi-Qars layihəsidir. Bu dəmir yolu xətti Azərbaycan ilə Türkiyəni bir-birinə bağlayan polad magistral yoldur. Bu yol vasitəsi ilə Çindən, Orta Asiya ölkələrindən tüklər Xəzər dənizi ilə birbaşa Türkiyəyə, oradan isə "Şərq-Qərb nəqliyyat dəhlizi" vasitəsi ilə Orta Asiya ölkələrinə və Çinə çatdırılır. 2017-ci ildə layihənin açılışından sonra həmin istiqamətlərdə yüklərin daşınmasında dinamik artım müşahidə edirik. 2020-ci ilin 7 ayında 180 min, 2021-ci ilin 7 ayında isə 284 min ton yük daşınıb. Bu da o deməkdir ki, yükdaşımada 50 faizədək artım olub.

Bundan əlavə, Şimal-Cənub dəhlizini birləşdirən İran İslam Respublikası ilə daşınan yüklər var. Həmin yüklərin daşınması optimal şəkildə həyata keçirilir. Bu yüklər İranla Rusiya arasında daşınan yüklərdir. ADY həmçinin Cənub-Qərb dəhlizi üzərindən də yüklərin daşınmasını həyata keçirir. İşğaldan azad edilmiş ərazilərimizdə Bərdə-Ağdam və Horadiz-Ağbənd dəmir yolu xəttlərinin yenidənqurulması istiqamətində intensiv işlər həyata keçirilməkdədir.

Şanlı Azərbaycan ordusunun əldə etdiyi uğurdan sonra 2020-ci ilin noyabr ayında cənab Prezident İlham Əliyev Bərdə-Ağdam dəmir yolu xəttinin layihələndirilməsi və tikintisi ilə bağlı tədbirlər haqqında Sərəncam imzaladı. Bu yol Yevlaxla Xankəndi arasında olan 104 kilometrlik ərazidə yerləşir.

1991-1993-cü illərdən sonra həmin ərazilərin son nöqtəsi Tərtər rayonunun Təzəkənd stansiyası olub. 30 il müddətində insanlar öz doğma yurdlarına həsrət qalmışdı. Hazırda Bərdə-Təzəkənd istiqamətində tikinti işləri başlayıb. Tikintinin həyata keçirildiyi ərazinin sahəsi 19 kilometrdir və iki hissədən ibarət olacaq. Növbəti mərhələdə isə dəmir yolunun 26 kilometrlik hissəsində tikinti işlərinə başlanılacaq. Bu dəmiryolu Təzəkənddən Ağdam stansiyasına qədər uzanacaq. İnfrastrukturun bərpası zamanı stansiya binaları, ötürücü qurğular, yollar və körpülərin tikintisi planlaşdırır. Tikinti zamanı piyadaların və avtomobillərin rahat və təhlükəsiz hərəkəti nəzərə alınacaq. Müasir standartlara uyğun keçidlərin və tunellərin inşası planlaşdırılır.

Uğurlu layihələrimizdən biri də Sumqayıt- Yalama layihəsidir. Bu layihə 2 hissədən ibarətdir və hər biri 166.5 kilometrlik layihələrdir. Bu yolun tikintisi Azərbaycanı Şimal qonşusu ilə birləşdirir. Cari ildən başlayaraq bu layihələrin həyata keçirilməsində daha dinamik addımlar atılır. Burada əsas hədəf həm sərnişin, həm yük daşımalarında stansiyalar arası sürət həddinin artırılmasıdır. Belə ki, sərnişinlərin daşınmasında sürət həddi 120, yüklərin daşınmasında isə 80-100 km nəzərdə tutulub.

- Pandemiya şəraiti yükdaşımalarına necə təsir göstərib?

Dünyada "COVİD-19" pandemiyasının davam etdiyi şəraitdə iri şirkətlər yüklərini daha çox dəmir yolu vasitəsi ilə daşımağa üstünlük verirlər. Bunun əsas səbəbi isə odur ki, dəmir yolu vasitəsi ilə daşınan yüklərdə minimum insan əməyindən istifadə olunur. Ona görə də dəmir yolu ilə daşınan yüklərdə azalma müşahidə edilmir. Dəmir yolu vasitəsi ilə keçən ilin 7 ayında 8 milyon 329 min, bu ilin 7 ayında isə 8 milyon 386 min ton yük daşınıb.

- "Azərbaycan Dəmir Yolları" QSC-nın əməkdaşlarından müharibədə şəhid və qazi olanlar oldumu?

- 44 günlük Vətən müharibəsi dövründə arxa cəbhədə çalışan digər dövlət qurumları kimi, ADY də bu prosesdə fəal iştirak edərək dəmir yolu ilə texnikaların vaxtında sərhədə çatdırılmasını təmin etdi. Həmçinin, "Azərbaycan Dəmir Yolları" QSC-nin 199 əməkdaşı Vətən müharibəsində iştirak edib. Onlardan 125 nəfəri müxtəlif medallarla təltif olunub, 4 nəfər isə şəhidlik zirvəsinə ucalıb.

- Daxili və beynəlxalq yükdaşımalarda qiymət artımı gözlənilirmi?

- "Azərbaycan Dəmir Yolları" QSC -nin beynəlxalq yükdaşıma tarif siyasəti ilə müqaviləsi var. Bütün dünya dövlətlərinin dəmir yolları bu müqaviləni ratifikasiya ediblər tarif siyasəti tənzimlənir. Müddəalara əsasən, hər bir dövlətin dəmir yolu öz ərazisində tarifi müəyyənləşdirir.

Aysel Yusifqızı
Aytəkin Cəlali

Telegramda izləyin