İcbari tibbi sığortaya hansı əməliyyatlar daxildir? - AÇIQLAMA

Son zamanlar insanları düşündürən məsələlərdən biri də tibbi sığorta ilə bağlıdır. Bu sığorta ilə bir sıra əməliyyatlar həyata keçirilir. Lakin maraqlıdır, orqan transplantasiyaları nə zaman icra olunacaq? Ümumiyyətlə, hansı əməliyyatlar icbari sığortaya daxildir?

Məsələ ilə bağlı Sonxeber.az-a deputat Musa Quliyev açıqlama verib.

O bildirib ki, artıq bir ildir, ölkədə icbari tibbi sığorta mövcuddur:

"İcbari tibbi sığorta bu ilin əvvəlində Abşeron zonasında fəaliyyətə başlayıb. İnsanları tez-tez narahat edən təxminən 3 minə yaxın xəstəlik növünün mualicəsi tibbi sığortaya daxildir. Proses uğurla davam edir. Lakin geniş yayılan, xərci çox olan xəstəliklərin hamısını birdən-birə icbari sığorta proqramına daxil etmək mümkün deyil. Bu, böyük büdcə vəsaiti tələb edir. Digər tərəfdən, icbari tibbi sığorta proqramının işə düşməsi koronavirus pandemiyası ilə üst-üstə düşdüyünə görə böyük çətinliklər yarandı. Bu səbəbdən planlaşdırılan işlər mərhələ-mərhələ həyata keçiriləcək. Amma bir çox əməliyyatlar artıq icbari tibbi siğorta ilə əhatə olunub. Bunlar arasında doğuşlar, mədə-bağırsaq sisteminin bütün əməliyyatları, ağır beyin əməliyyatları, açıq ürək əməliyyatları, stend qoyulma və s. Amma orqan transplantasiyası hələ ki, icbari tibbi sığorta proqramına daxil edilməyib.

Bir çox ölkələrdə bütün əməliyyatlar tam icbari sığorta ilə əhatə olunmur. Müəyyən hissəsini tibbi sığorta qarşılayır, müəyyən hissəsini isə vətəndaşın özü və yaxud tapdığı sponsor qarşılayır. Yaxın gələcəkdə, yəqin, bizim ölkədə də icbari tibbi sığorta fondunun maliyyə imkanları genişlənər və bu məsələ tam həllini tapar".

"Bu vaxta qədər əməliyyatlar tibbi sığorta hesabına həyata keçirilibmi?" sualına isə deputat belə cavab verib:

"Bəli, artıq həyata keçirilən bir çox əməliyyatların maliyyə xərcləri tibbi sığorta ilə qarşılanıb".

Zaira Akifqızı

Telegramda izləyin