BNA-dan ŞİKAYƏT: "Səbəbsiz yerə cərimə yazıb, daha sonra miqdarını artırıblar" - FOTO

BNA -dan qanunsuz cərimə yazılması və daha sonra səbəbsiz olaraq miqdarının artırılması ilə bağlı şikayət var.

Sonxeber.az xəbər verir ki, şikyətçi Nəsimi Dəryanın sosial şəbəkədə bildirdiyinə görə, onu dayanma-durmanı qadağan edən işarənin olmadığı yerdə cərimələyiblər:

"Şikayətim yarandığı vaxtdan bu günədək, ölkədəki bir çox qurum kimi, heç bir iş görməyib, yalnız xalqı soymaqla məşğul olan BNA-dandır. Neftçilərdə iki ay əvvəl "LC Waikiki"nin qarşısında 10-15 dəqiqə maşın saxladığım üçün onu çəkib telefonuma göndəriblər. Qeyd etmək istəyirəm ki, həmin yerdə dayanma-durmanı qadağan edən işarə yoxdur.

Yerdə yol çiyninə perpendikulyar olaraq çəkilmiş xətlər var, (şəkildə görünmür) bu da orada maşın saxlamaq üçün heç bir problem olmadığını sürücüyə göstərir.

Şəkili yol kənarındakı dirəkdə olan yol kamerası ilə çəkib göndəriblər. Çoxumuz bilirik ki, bu formada aktın yazılıb göndərilməsi qeyri-qanunidir".

Şikayətçi, həmçinin, qeyd edib ki, protokolu şikayət edib və iki ay keçməsinə baxmayaraq, ona bu barədə cavab gəlməyib. Eyni zamanda, onun sözlərinə görə, şikayətdən sonra cərimə 18 manatdan 23 manata qalxıb.

Mövzuyla bağlı qarşı tərəfin mövqeyini dərc etməyə hazırıq.

Aytəkin CƏLALİ

Telegramda izləyin