Külək ağacları aşırdı, yol bağlandı - FOTO

Yevlaxın Əkşəm kəndi ərazisində iri qovaq ağacları aşaraq sakinlərin təsərrüfatlarına gediş-gəliş yolunu bağlayıb.

Sonxeber.az Sputnik.az-a istinadla xəbər verir ki, kəndin yaxınlığında yerləşən obyektdə gözətçi işləyən Yəhya İdrisov iri gövdəli ağaclardan birinin başqa cavan ağacların üstünə aşdığını deyib.

"Bu nəhəng ağacları Əkşəm kəndindən olan Sahib kişi əkib. Bura yayda çox sərin olur, Mingəçevir-Xaldan yolu ilə hərəkətdə olan əksər insanlar burada dayanıb yol yorğunluqlarını çıxarırlar. Amma külək əsəndə çox təhlükəli olur, mən buradan hərəkət edənlərə deyirəm ki, ağacların altında durmasınlar. Son günlər əsən güclü külək iri budaqları qırdı, onlar da düşdü yola. Sakinlərin gediş-gəlişi çətinləşdi. Bura traktor yoludur, ot gətirirlər, mal-qara aparırlar. Nəhəng ağacların yola düşən budaqları çox böyükdür. Qovağın biri də aşıb yaşıl ağacların üstünə, onları məhv edir. Qırılıb yola düşən budağın bir hissəsi qalıb, gecələr şaqqıltısından burada dura bilmirəm. Hər dəqiqə qorxuludur, hər an aşa bilər", - gözətçi bildirib.

Qeyd edək ki, aidiyyəti qurumlar əraziyə baxış keçiriblər, fəsadların aradan qaldırılmasına başlanıb. Həmçinin ərazidə bir neçə irigövdəli ağacın təhlükə yaratma dərəcəsi yerli ekoloqlar tərəfindən araşdırılır.

Telegramda izləyin