Botoks iflic edir? - ŞOK AÇIQLAMA

Son zamanlar xanımlarımız gözəlliklərinə gözəllik qatmaq məqsədi ilə kosmetoloqlara üz tuturlar və müəyyən prosedurlardan keçirlər. Qadınlar üz, alın, burun, dodaq nahiyələrinə dolğu edtirirlər. Bəs cavanlaşmaq üçün edilən botoks hansı fəsadları yaradır?

Məsələ ilə bağlı Sonxeber.az-a aromaterapevt Zümrüd Rəhimova açıqlama verib.

O bildirib ki, botoks kimi tanıdığımız preparat əslində sinir sistemi üçün çox təhlükəli toksindən (zəhərdən) istehsal edilir:

"Botoks əslində prosedurun adı deyil, botuloterapiya məqsədilə istifadə edilən, tərkibində botulotoksin olan preparatın adıdır. Sadəcə botoks ilk gözəllik inyeksiyalarından olduğuna görə üzə vurulan iynələri hər kəs botoks bilir.

Ümumiyyətlə, botulotoksin çox güclü bir sinir zəhəridir. Sinir-əzələ əlaqəsini bloklayır. Biz bu əlaqəyə "sinaps" deyirik. Toksinin əsas funksiyası həmin əlaqəni bloklamaqdır.

Bildiyimiz bu zəhər əzələ-sinir sisteminə təsir göstərərək ötürücülüyü bloklayıb, iflic edir. Hazırda tibb sahəsində, xüsusən gözəllik sənayəsində toksinin bloklama təsirindən çox geniş istifadə olunur. Botoks əsasən üzdə olan səthi və dərin qırışların açılması üçün tətbiq olunur. Botulotoksinin 7 serotipi var. Terapevtik məqsədlə əsasən A serotipi, digər serotiplər isə ümumiyyətlə çox az halda istifadə edilir.

Botulizm xəstəliyi var, toksinemik infeksiyalara aiddir. İlk dəfə bu infeksiyaya yoluxma kolbasadan baş verdiyinə görə və zəhərlənmənin məhz oradan qaynaqlandığı üçün xəstəliyin adı botulizm (latınca "botulus" kolbasa deməkdir) qoyulub.

Botulizm zamanı nə baş verir? Botulotoksinlə çirklənmiş qidanı qəbul etdikdən sonra ilk 4-6 saat ərzində həzm əlamətləri özünü göstərməyə başlayır. Bundan sonra isə sinir sistemi ilə bağlı ən təhlükəli əlamətlər üzə çıxır: ağızda quruluq, ağız suyu ifrazının azalması, tənəffüs əzələlərinin iflici. Toksin nəfəs orqanlarına çatdıqda, artıq tənəffüs dayanmış olur. Ona görə də zəhərlənmənin ilk əlamətini gördükdə dərhal müalicəyə başlamaq lazımdır. Bu zaman antidotdan istifadə edilir.

Botoks proseduru zamanı yan təsirlərin yaranmasında həm həkim, həm də pasiyent səhvi ola bilər. Pasient səhvi ondan ibarətdir ki, həkimin verdiyi məsləhətlərə düzgün əməl etməsin.

Botuloterapiyanın gələcəkdə xərçəng yaratma riski yoxdur".

ZAİRA AKİFQIZI

Telegramda izləyin