Dərman alarkən bu səhvlərə yol verməyin! - VACİB XƏBƏRDARLIQ

Dərman preparatlarının istifadəsi, satışı və saxlanması ilə bağlı qaydaların pozulmasına görə cərimələrin tətbiqi əhalinin sağlamlığının qorunması və dərman bazarında təhlükəsizliyin təmin edilməsi baxımından mühüm əhəmiyyət daşıyır. Xüsusilə, mənşəyi məlum olmayan, saxta və ya düzgün saxlanılmadığı üçün keyfiyyətini itirmiş dərmanların dövriyyədə olması insan sağlamlığı üçün ciddi risklər yarada bilər. Bu səbəbdən həm satış məntəqələrinə nəzarət, həm də vətəndaşların dərman alarkən diqqətli davranması vacibdir.

Bəs, dərmanların satışı, istifadəsi və saxlanması zamanı hansı pozuntular insan sağlamlığı üçün daha ciddi təhlükə yaradır? Vətəndaşlar aldıqları dərmanların keyfiyyətini, mənşəyini və saxlanma şəraitinin tələblərə uyğunluğunu necə yoxlaya bilərlər?
Mövzu ilə bağlı Sonxeber.az-a açıqlama verən farmakoloq Aydın Əliyev bildirib ki, dərman vasitələrinin hazırlanması, ölkəyə gətirilməsi, tərkibi və saxlanma şəraiti ilə bağlı qaydalar pozulduqda tətbiq edilən cərimələr dərman təchizatına mənfi təsir göstərməz:

"Əksinə, bu cür tədbirlər dərmanların keyfiyyətinin və təchizat prosesinin daha da yaxşılaşdırılmasına xidmət edə bilər. Əvvəllər dərmanların içərisinə istifadə qaydalarını izah edən qısa təlimat vərəqləri qoyulurdu. Həmin təlimatlarda, əsasən, dərmanın yeməkdən əvvəl və ya sonra, gün ərzində neçə dəfə qəbul edilməli olduğu qeyd edilirdi. Hazırda isə dərmanların içlik vərəqələrində daha ətraflı məlumat verilir. Burada preparatın hansı hallarda istifadə edilə biləcəyi, kimlərə uyğun olmadığı, qəbul qaydaları, dozası və saxlanma şəraiti barədə məlumatlar yer alır".

Ekspert bildirib ki, dərmanların içlik vərəqələrinin əvvəlkindən daha geniş olması təkcə Azərbaycana xas deyil, beynəlxalq təcrübədə də belə yanaşma mövcuddur:

"Bu məlumatlar insanların dərman vasitələri haqqında daha ətraflı məlumat əldə etməsinə kömək edir. Vətəndaşlar dərman vasitəsinin istifadəsi ilə bağlı bir çox sualların cavabını onun içərisinə qoyulan annotasiyanı oxumaqla öyrənə bilərlər. Həmin vərəqədə preparatın istifadə qaydaları, dozası, əks-göstərişləri və saxlanma şəraiti haqqında məlumatlar əks olunur. Buna görə də vətəndaşlar dərman qəbul etməzdən əvvəl annotasiyanı diqqətlə oxumalı və orada göstərilən məlumatlarla tanış olmalıdırlar. Bununla belə, dərmanın istifadəsi ilə bağlı şübhə yarandıqda mütəxəssisə müraciət etmək vacibdir".

Röyalə Xəyal

Telegramda izləyin