Bu ölkədə 5 yaşa qədər uşaqlar ölür: Azərbaycanda yeni virus təhlükəsi var?

Konqoda son zamanlar naməlum səbəbdən 5 yaşa qədər uşaqların ölüm halı qeydə alınıb. Səbəb kimi bəziləri malyariyanı, bəziləri isə başqa xəstəliklərin olduğunu iddia edirlər. Ölkəmizdə də uşaqlar arasında belə bir xəstəliyin yayılma ehtimalı varmı?

Məsələ ilə bağlı Sonxeber.az-a infeksionist Nicat Əzimli açıqlama verib.

O bildirib ki, Konqodakı virus dünya üçün ciddi təhlükə kəsb etmir və yeni pandemiya yaratmaq təhlükəsi daşımır:

"Narahatlığa səbəb budur ki, hazırda Konqoda 2 ayrı şəhərdə bu xəstəlikdən günə 4 uşaq ölümü qeydə alınır. Xüsusilə 5 yaşa qədər uşaqların xəstələnib ağırlaşması faktı törədicinin malyariya deyil, başqa infeksiya ola biləcəyi şübhəsini doğurur.

Lakin, həmin uşaqarda malyariya testi ekspress-müayinə zamanı pozitiv çıxıb, müayinənin daha dəqiq üsullarla aparılıb-aparılmadığı barədə isə heç bir məlumat verilmir.

Malyariya barədə danışsaq, bu xəstəlik endemik transmissiv infeksion xəstəlikdir. Yəni infeksiya həşərat vasitəsilə insandan insana ötürülür. Xəstəliyi daşıyan həmin həşəratlar dişi "Anofeles" ağcaqanadlarıdır və bu tip infeksiyaların ocağı yalnız həmin həşəratların yaşadığı arealda lokallaşır. Həmin həşəratların habitatı xaricində xəstəlik ciddi təhlükə kəsb etmir və yeni bir pandemiya yaratmaq təhlükəsi daşımır".

ZAİRA AKİFQIZI

Telegramda izləyin