Bakıda Zəfər Gününə həsr olunan "Qarapapaq Peşəkar Boks gecəsi" - FOTO

Azərbaycan Peşəkar Boks Federasiyasının dəstəyi, "Qarapapaq Fight Club & Promotion" və "Olimp Pro"nun birgə təşkilatçılığı ilə 8 Noyabr Zəfər Gününə həsr olunmuş "Qarapapaq Peşəkar Boks gecəsi" keçirilib.

Sonxeber.az xəbər verir ki, paytaxt Bakıda baş tutan "Qarapapaq Peşəkar Boks gecəsi" Türkün, Qafqazın, Vətənimiz Azərbaycanın milli-mədəni dəyərlərini, bu dəyərlərdən doğan döyüş ruhunu, gücünü simvolizə edir.

Tədbirin əvvəlində şəhidlərin əziz ruhu bir dəqiqəlik sükutla yad edilib. Gecədə Azərbaycan idman ictimaiyyətinin tanınmış simaları, olimpiya və dünya çempionları, ictimai və siyasi xadimlər, həmçinin biznes dünyasının tanınmış simaları iştirak ediblər.

Tanınmış şoumen Şəhriyar Əbilovun aparıcılıq etdiyi tədbirdə ilk olaraq açılış sözü ilə "Qarapapaq Fight Club & Promotion"-un prezidenti Aqil Acalov çıxış edib. O, əldə olunan zəfərin səbəbkarlarını yad edib və xalq olaraq istər şəhid, istər qazi, istərsə də Vətən müharibəsinin digər iştirakçılarına bu gün çox şey borclu olduğumuzu vurğulayıb.

Gənc nəslin fiziki və mənəvi cəhətdən sağlam yetişməsi üçün idmanın əsas vasitələrdən biri olmasından və bu sahənin inkişafının vacibliyindən danışan Aqil Acalov bildirib ki, klubun təkcə peşəkar boks yarışları deyil, o cümlədən MMA, ciu-citsu, kikboksinq növləri üzrə də bir sıra turnirlərinin keçirilməsi nəzərdə tutulub və bu turnirlərin yalnız ölkəmizdə deyil, eyni zamanda ölkə hüdudlarından kənarda da həyata keçirilməsi planlaşdırılır.

Daha sonra "Olimp Pro Sport Organization"un təsisçilərindən, eyni zamanda "Motivator Azerbaijan" layihəsinin təsisçisi Rüfət Həsənov öz çıxışında ölkəmizdə peşəkar idmanın inkişafına yönəlmiş perspektivlərdən, "Olimp Pro"nun yaradılmasının məqsəd və qayələrindən söz açaraq bu yolda daim idmançılarımıza dəstək olmağa hazır olduqlarını bildirib. O, idmançılarımızın hər zaman bayrağımızı yüksəklərdə dalğalandırmağa çalışmalı olduqlarını deyərək, idmanın bunun üçün xüsusi fürsət olduğunu vurğulayıb.

"Olimp Pro Sport Organization"un digər təsisçisi, eyni zamanda "Azart Tuning" qrupunun yaradıcısı Arif Zeynalov da, öz növbəsində, ölkəmizdə idmana olan diqqət və qayğıdan danışıb. O, Azərbaycanda idmanın bu qədər inkişafında dövlətin və bilavasitə dövlət başçısı cənab İlham Əliyevin müstəsna xidmətlərindən danışıb. Ulu öndər Heydər Əliyev məktəbinin layiqli davamçısı olaraq, ölkə başçısının bu sahəni hər zaman xüsusi diqqətdə saxladığını vurğulayan A. Zeynalov idmanın Vətənimiz və xalqımız üçün xüsusi əhəmiyyətə malik olduğunu deyib.

Açılış sözünə davam edən Azərbaycan Peşəkar Boks Federasiyasının birinci vitse-prezidenti, müstəqil Azərbaycanın boks üzrə ilk dünya çempionu Fərhad Acalov, qalib ölkənin vətəndaşları olaraq, xalqımızı hər zaman bütün sahələrdə hamıdan güclü olmaq üçün mübarizə aparmaqda israrlı olmağa səsləyib və bu səbəbdən peşəkar boks üzrə dünya çempionlarını yetişdirməyi qarşısına məqsəd qoyduğunu vurğulayıb.

Bakı İdman Sarayında baş tutmuş turnirdə orta və ağır çəki dərəcələrində 12 peşəkar boksçunun iştirakı ilə ümumilikdə 6 döyüş keçirilib. Qaliblərə pul və digər qiymətli hədiyyələr təqdim olunub.

Həmin döyüşlərin və idmançıların siyahısını təqdim edirik:

1. Mustafazadə Ağasəlim – Bəbirov Əzrək. Bəbirov Əzrək hakimlərin yekdil qərarı ilə qalib gəlib.
2. Nicat Məhərrəmov – Kazımov Kənan. Kazımov Kənan hakimlərin yekdil qerarı ilə qalib gəlib.
3. Babayev Ramazan – Abdullayev Nihat. Abdullayev Nihat texniki nokaut ilə qalib gəlib.
4. Qurbanov Xanbala – Məmmədov Ruslan. Məmmedov Ruslan hakimlərin yekdil qərarı ilə qalib gəlib.
5. Şəmiyev Zabeh – Ağayev Rauf. Ağayev Rauf hakimlərin yekdil qərarı ilə qalib gəlib.
6. Camaluddinov Azədullah – Tarverdi Fuad. Tarverdi Fuad hakimlərin yekdil qərarı ilə qalib gelib.
9. Heydərov Pərvin – Həsənov Nicat. Döyüş heç-heçə başa çatıb.

ZAİRA AKİFQIZI

Telegramda izləyin