Ərzaq qiymətləri bu halda ucuzlaşa bilər - AÇIQLAMA

Son aylar ölkəmizdə ərzaq qiyməti sürətlə artırılır. Tarif şurası 5 artırırsa, marketlər 15 əlavə edir. Yay aylarında 100 AZN-ə 10 günlük bazarlıq etmək olurdusa, bu gün həmin məbləğ 3 günə bəs edir. Nəzərə alsaq ki, insanların aldığı maaş qiymətlərə görə aşağıdır, qiymətlərin də ona uyğun tənzimlənməsi daha məqsədəuyğun olardı. Bəs süni qiymət artımlarına kim və necə nəzarət etməlidir?

Məsələ ilə bağlı Sonxeber.az-a deputat Aqil Abbas açıqlama verib.

O, süni qiymət artımının qarşısının təcili alınmalı olduğunu vurğulayıb:

"Dövlət bir qiymət təyin edir, mağaza sahibi topdan satış qiymətinə alır və özü faiz əlavə edib satır. Elə şeylər var ki, dövlət onun qarşısını mütləq almalıdır. Bəzi şeylər də var ki, onların qiymətini Tarif Şurası müəyyənləşdirmir, buna bazar iqdisadiyyatı nəzarət edir.

Dövlətin vergi orqanları, qida təhlükəsizliyinə nəzarət edən qurumları var. Xüsusən vergi orqanları marketləri gəzib, hansı ərzağın qiymətinin nə qədər artırıldığını görməlidir və bunun qarşısını dərhal almalıdır.

Bazara girə bilməzlər, çünki orada qiymətləri məhsulu gətirən adam təyin edir. Amma lazımi orqanlar mağazalara nəzarət edə bilərlər.

Bayrama görə şəhərdə yarmarkalar açılıb, qiymətlər də ucuzdur. Amma iş bununla bitmir, çünki belə yarmarkalar təkcə bayramlarda olur. Mütləq vəziyyət nizamlanmalıdır, süni artım edənlər isə cəzalandırılmalıdırlar".

ZAİRA AKİFQIZI

Telegramda izləyin