Üçrəngli bayrağımız - Azərbaycan dövlətçiliyinin, milli qürurun və müstəqilliyimizin rəmzi

Azərbaycan Respublikasının Dövlət Bayrağı xalqımızın milli kimliyini, tarixi yaddaşını, azadlıq və müstəqillik uğrunda mübarizəsini özündə yaşadan müqəddəs dövlətçilik rəmzidir. Hər il noyabrın 9-da qeyd olunan Dövlət Bayrağı Günü Azərbaycan xalqının milli qürurunu, vətənə bağlılığını və müstəqil dövlətçilik iradəsini bir daha nümayiş etdirir. Üçrəngli bayrağımız sadəcə dövlət atributu deyil, xalqımızın əsrlər boyu yaşatdığı azadlıq ideallarının, milli-mənəvi dəyərlərinin və gələcəyə inamının ifadəsidir.

Mavi, qırmızı və yaşıl rənglərdən, ağ aypara və səkkizguşəli ulduzdan ibarət olan Azərbaycan bayrağının hər bir rəngi dərin məna daşıyır. Mavi rəng türkçülük ideyasını və milli mənsubiyyətimizi, qırmızı rəng müasirliyi, inkişafı və demokratik dəyərləri, yaşıl rəng isə islam sivilizasiyasına mənsubluğumuzu ifadə edir. Bu rənglərin vəhdəti Azərbaycan xalqının milli kimliyini, dünyagörüşünü və tarixi-mədəni irsini özündə birləşdirir.

Üçrəngli bayrağımızın dövlətçilik tariximizdə xüsusi yeri vardır. 1918-ci il noyabrın 9-da Azərbaycan Xalq Cümhuriyyəti hökuməti tərəfindən qəbul edilən bu bayraq xalqımızın müstəqillik iradəsinin rəmzinə çevrildi. 1920-ci ildə Cümhuriyyətin süqutundan sonra üçrəngli bayrağımız rəsmi dövlət atributu kimi istifadədən çıxarılsa da, xalqın yaddaşında və milli istiqlal düşüncəsində yaşamaqda davam etdi. 1990-cı il noyabrın 17-də Naxçıvan Muxtar Respublikası Ali Məclisinin qərarı ilə üçrəngli bayraq yenidən dövlət bayrağı kimi qəbul edildi. Həmin qərarın qəbulunda Ümummilli Lider Heydər Əliyevin tarixi xidmətləri xüsusi əhəmiyyət daşıyır. 1991-ci il fevralın 5-də isə Azərbaycan Respublikasının Ali Soveti üçrəngli bayrağı dövlət bayrağı kimi təsdiq etdi.

Müstəqil Azərbaycanın dövlətçilik tarixində Ümummilli Lider Heydər Əliyevin müəyyən etdiyi siyasi kursun davam etdirilməsi nəticəsində milli dövlətçilik rəmzlərimiz daha da möhkəmləndi. Prezident İlham Əliyevin rəhbərliyi ilə həyata keçirilən siyasət isə Azərbaycan bayrağının beynəlxalq miqyasda nüfuzunun yüksəlməsinə, dövlətimizin gücünün və suverenliyinin nümayişinə mühüm töhfə verdi.

Xüsusilə Vətən müharibəsində qazanılan tarixi Zəfər üçrəngli bayrağımızın mənəvi və siyasi əhəmiyyətini daha da artırdı. Uzun illər işğal altında qalan torpaqlarımızın azad edilməsi, Şuşada, Xankəndidə və digər ərazilərimizdə Azərbaycan bayrağının dalğalanması xalqımızın tarixi ədalətə qovuşmasının rəmzinə çevrildi. 2023-cü ilin sentyabrında Azərbaycanın bütün ərazisində dövlət suverenliyinin bərpası isə üçrəngli bayrağımızın ölkəmizin hər qarışında dalğalanmasını təmin edən tarixi hadisə oldu.

Bu gün Azərbaycan bayrağı yalnız ölkə daxilində deyil, dünyanın müxtəlif dövlətlərində, beynəlxalq təşkilatların qərargahlarında, idman arenalarında və diplomatik nümayəndəliklərimizdə dalğalanır. Bayrağımızın beynəlxalq tədbirlərdə yüksəldilməsi Azərbaycanın müstəqil siyasətinin, artan nüfuzunun və güclənən mövqeyinin göstəricisidir.

Dövlət Bayrağı Gününün qeyd olunması həm də gənc nəslin vətənpərvərlik ruhunda tərbiyəsi baxımından mühüm əhəmiyyət daşıyır. Hər bir Azərbaycan vətəndaşı dövlət bayrağının tarixini, mənasını və müqəddəsliyini bilməli, ona hörmətlə yanaşmalıdır. Çünki bayrağa hörmət dövlətə, xalqa, Vətənə və müstəqilliyə hörmət deməkdir. Bu baxımdan təhsil müəssisələrində, ailələrdə və cəmiyyətdə milli rəmzlərimizin təbliği xüsusi diqqət mərkəzində saxlanılmalıdır.

Prezident İlham Əliyevin rəhbərliyi ilə Azərbaycan bu gün öz suverenliyini təmin etmiş, beynəlxalq münasibətlər sistemində mövqeyini möhkəmləndirmiş güclü dövlətdir. Bu reallıq üçrəngli bayrağımızın daşıdığı mənanın yalnız tarixi keçmişlə məhdudlaşmadığını, eyni zamanda bugünkü qüdrətimizi və gələcək hədəflərimizi ifadə etdiyini göstərir.

Dövlət Bayrağı Günü hər birimizə xatırladır ki, müstəqillik böyük tarixi mübarizənin, milli birliyin və fədakarlığın nəticəsidir. Bu bayraq uğrunda canından keçən şəhidlərimizin qanı, qazilərimizin qəhrəmanlığı və xalqımızın iradəsi dayanır. Ona görə də üçrəngli bayrağımızı qorumaq, ucaltmaq və gələcək nəsillərə əmanət etmək hər bir vətəndaşın mənəvi borcudur.

Bu gün Azərbaycan bayrağı azadlığımızın, suverenliyimizin, milli birliyimizin və qalib dövlətimizin rəmzi kimi yüksəklərdə dalğalanır. Bayrağımız daim ucalarda olsun!

Azər Badamov
Milli Məclisin deputatı

Telegramda izləyin