"Oranı keçənə kimi dua edə-edə gedirik" - Qaranlıq yollara nə zaman işıq çəkiləcək?

Sabunçu rayonunda bəzi yolların qaranlıq olması təhlükə yaradır.

Sonxeber.az-ın redaksiyasına mövzuyla bağlı şikayət daxil olub.

Şikayətçi Günay xanım həmin ərazidə maşın sürdüyü zaman qarşısına piyadanın çıxacağından, qəza baş verəcəyindən qorxduğunu bildirib:

"Bakıxanov tərəfdən də, Suraxanı rayonu istiqamətindən də Qaraçuxura gələndə yollarda işıqlandırma yoxdur. Bu yollar Sabunçu rayon İcra Hakimiyyətinin tabeliyindədir. Biz saat 07:00, 07:15-də bu yollardan keçib işə gedirik. Küçə Səttar Bəhlulzadə adınadır. Oranı keçənə kimi dua edə-edə gedirik ki, qarşımıza bir piyada çıxmasın. Yollar bərbad vəziyyətdədir, qapqaranlıqdır. Maşının da işığı yalnız öz qarşısını işıqlandıra bilir. Biz yolu normal gedə bilmirik. Piyadalar, maşınlar, yol keçənlər, məktəblilər təhlükə qarşısındadırlar. Artıq 3 gündür ki, şikayət yazmışam, lakin müraciətimə baxılmır. Sabunçu rayon İcra Hakimiyyətinin rəsmi "Facebook" səhifəsinə yazmışam, ona da baxılmayıb. Bilmirəm, başqa nə edim ki, bu problem həllini tapsın".

Məsələ ilə bağlı Sabunçu rayon İcra Hakimiyyəti ilə əlaqə saxladıq. Həmin ərazinin iki rayon arası kəsişmə olduğunu və sözügedən küçənin Suraxanı rayon İcra Hakimiyyətinə aid olduğunu qeyd etdilər.

Suraxanı rayon İcra Hakimiyyəti ilə əlaqə saxlamağa çalışsaq da, zəngimiz cavabsız qaldı.

Aysel Səfərzadə

Telegramda izləyin