"Sən nə gözəlsən" deyib uşaqları sevindirən müəllimə GÜNDƏM OLDU - VİDEO

Son vaxtlar təhsil müəssisələrində baş verən bəzi hadisələr, şagird-muəllim, uşaq-tərbiyəçi münasibətləri təhsil sistemində baş verən mənfilikləri ortaya qoydu. Amma bir neçə gündür ki, sosial şəbəkələrdə sevilərək paylaşılan video hər kəsin üzündə təbəssümə və bu yolda ümidə səbəb oldu. Söhbət Lənkəranın Jidi kəndində çalışan Leyla Qarazadə və onun "kəpənək" adlandırdığı şagirdlərindən gedir.

Sonxeber.az Leyla müəlliməni daha yaxından tanımaq və tanıtmaq üçün onunla ilə əlaqə saxlayıb.

2018-ci ildə adı çəkilən kəndə müəllimə təyin olunan Leyla xanım elə o zamandan hədəfinin əylənərək öyrətmək olduğunu deyir.

Onun fikrincə, dərs prosesi yalnız "ciddi sifətlə" 45 dəqiqə durmadan nəyisə oxutmaq, danışmaq və ya əlinə telefon götürüb "TikTok"da vaxt keçirmək deyil.

Leyla Qarazadə işini də, şagirdləri də sevən müəllimlərdəndir. O, uşaqları belə motivasiya etdikdə, digərlərinə də onların enerjisinin keçdiyini deyir:

"Kənd məktəbinə təyin olunduğum ilk günlərdən valideynlərdən müsbət geri dönüşlər almağa başladım. Onlar mənə təşəkkür edirdilər, deyirdilər ki, özləri vaxt tapıb uşaqlarla oynaya, əylənə bilmirlər, amma indi uşaqları məktəbdə tətbiq etdiyimiz oyunları evdə də təkrarlayırlar. Mən yalnız uşaqlarla deyil, həm də valideynlərlə çalışmaga başladım. Çünki münasibətləri uşaqların inkişafında mühüm rol oynayır.

Kənddə görülən nə iş varsa, biz birlikdə edirik: çörək yapmaq, gül əkmək və s. Mən uşaqlara "kəpənəklərin" deyirəm. Çünki onlara "sən bu gün çox gözəlsən" deyəndə, onların gözündəki ışıltıni, kəpənək kimi uçmaq istədiklərini görürəm. Bu gün "sən nə gözəlsən" sözü bizim məktəbdə, demək olar ki, şüara çevrilib. Bu sözün sehrindən onların özlərinə inamının artdığını, öz gözəlliklərini kəşf etdiklərini görürəm. Dərslərdə fəal iştirak edir və gün ərzində bu sözləri bir-birinə də deyirlər".

Müəllim otağın içində böyük kitabxana düzəldə bilər. Amma o otağın qapısı bağlı qalsa, heç kim faydalana bilməz. Ona görə də uşaqlara, Leyla müəllimə kimi, düzgün açar, motivasiya da vermək lazımdır.

Onun çəkdiyi və son günlər böyük marağa səbəb olan videonu təqdim edirik:

Aygün Osmanlı

Telegramda izləyin