9 Noyabr - Dövlət Bayrağı Günü: Azərbaycan xalqının milli qürur və müstəqillik rəmzi

9 Noyabr - Dövlət Bayrağı Günü Azərbaycan xalqının tarixində xüsusi yeri və mənəvi əhəmiyyəti olan əlamətdar günlərdən biridir. Bu tarix xalqımızın milli kimliyini, dövlətçilik ənənələrini, azadlıq və müstəqillik uğrunda mübarizə əzmini özündə birləşdirən üçrəngli bayrağımıza olan sonsuz ehtiramın ifadəsidir. Azərbaycan Respublikasının Dövlət Bayrağı sadəcə dövlət rəmzi deyil, həm də xalqımızın keçdiyi mürəkkəb tarixi yolun, milli birliyinin, suverenliyinin və gələcəyə inamının təcəssümüdür.

Azərbaycanın üçrəngli bayrağı ilk dəfə 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə dövlət bayrağı kimi qəbul edilib. Bu qərar Şərqdə ilk demokratik respublikalardan biri olan Azərbaycan Xalq Cümhuriyyətinin milli dövlətçilik ideallarına sadiqliyinin mühüm göstəricisi idi. Bayrağımızın rənglərində ifadə olunan türkçülük, müasirlik və islam mədəniyyəti ideyaları Azərbaycan xalqının tarixi-mənəvi dəyərlərini özündə əks etdirirdi.

1920-ci ildə Azərbaycan Xalq Cümhuriyyətinin süqutundan sonra üçrəngli bayrağımız dövlət rəmzi kimi istifadədən çıxarılsa da, xalqımızın yaddaşından və qəlbindən heç zaman silinmədi. Uzun illər ərzində milli müstəqillik arzusu ilə yaşayan Azərbaycan xalqı öz bayrağına azadlığın və dövlət müstəqilliyinin simvolu kimi yanaşdı. 1990-cı il noyabrın 17-də Ulu Öndər Heydər Əliyevin təşəbbüsü və rəhbərliyi ilə Naxçıvan Muxtar Respublikasının Ali Məclisində üçrəngli bayrağımız dövlət bayrağı kimi qəbul edildi. Bu tarixi qərar müstəqilliyə gedən yolda mühüm siyasi və mənəvi addım oldu.

1991-ci il oktyabrın 18-də Azərbaycan dövlət müstəqilliyini bərpa etdikdən sonra üçrəngli bayrağımız müstəqil dövlətimizin əsas rəmzlərindən birinə çevrildi. Beləliklə, xalqımızın milli azadlıq arzusu dövlətçilik reallığına çevrildi, üçrəngli bayrağımız Azərbaycanın müstəqilliyini və suverenliyini bütün dünyaya nümayiş etdirməyə başladı.

Bu gün Prezident İlham Əliyevin rəhbərliyi ilə Azərbaycan dövlətçiliyinin möhkəmləndirilməsi, milli maraqların qorunması və ərazi bütövlüyünün təmin olunması istiqamətində həyata keçirilən siyasət Dövlət Bayrağımızın daşıdığı mənəvi-siyasi məzmunu daha da zənginləşdirib. Xüsusilə Vətən müharibəsində qazanılan tarixi Zəfər, 2023-cü ildə ölkəmizin bütün ərazisində suverenliyinin tam bərpa olunması üçrəngli bayrağımızın dövlətçilik tariximizdəki əhəmiyyətini yeni mərhələyə yüksəldib.

44 günlük Vətən müharibəsində Azərbaycan Ordusunun göstərdiyi qəhrəmanlıq, şəhidlərimizin canı və qanı bahasına əldə edilən tarixi qələbə xalqımızın bayrağa olan sevgisini və bağlılığını daha da gücləndirdi. Şuşada, Cəbrayılda, Füzulidə, Zəngilanda, Qubadlıda, Laçında və digər azad edilmiş ərazilərimizdə üçrəngli bayrağımızın dalğalanması milli yaddaşımızda silinməz iz buraxdı. Bu mənzərə yalnız hərbi qələbənin deyil, həm də tarixi ədalətin, milli iradənin və dövlət suverenliyinin təntənəsi idi.

Bu gün üçrəngli bayrağımız işğaldan azad edilmiş torpaqlarımızda, dövlət müəssisələrində, təhsil ocaqlarında, beynəlxalq tədbirlərdə və dünyanın müxtəlif ölkələrində dalğalanaraq Azərbaycanın müstəqil dövlət kimi mövqeyini nümayiş etdirir. Xüsusilə Böyük Qayıdış prosesinin həyata keçirildiyi Qarabağ və Şərqi Zəngəzurda bayrağımızın ucaldılması doğma torpaqlara qayıdan insanların ümid və qürur mənbəyidir.

Dövlət Bayrağı Günü həm də gənc nəslin vətənpərvərlik ruhunda tərbiyəsi baxımından mühüm əhəmiyyət daşıyır. Gənclərimiz bilməlidirlər ki, bayraq yalnız üç rəngdən ibarət parça deyil. O, müstəqilliyimizin, milli ləyaqətimizin, tariximizin və gələcək nəsillər qarşısında məsuliyyətimizin rəmzidir. Bayrağa hörmət dövlətə, xalqa, Vətənə və onun müstəqilliyinə hörmət deməkdir.

Bu baxımdan dövlət rəmzlərinin təbliği, onların tarixi və ideoloji mahiyyətinin gənc nəslə aşılanması hər bir vətəndaşın mənəvi borcudur. Azərbaycançılıq ideologiyasının əsas istiqamətlərindən biri də milli dəyərlərə, dövlətçilik ənənələrinə və ümummilli maraqlara bağlılığın qorunmasıdır.

9 Noyabr - Dövlət Bayrağı Günü Azərbaycan xalqının tarixə, milli kimliyə və dövlət müstəqilliyinə sədaqətinin ifadəsidir. Bu bayraq əsrlər boyu yaşadılacaq azadlıq ideallarımızın, milli birliyimizin və güclü Azərbaycan dövlətinin rəmzidir. Üçrəngli bayrağımız daim yüksəklərdə dalğalanmalı, onun təmsil etdiyi müstəqillik, suverenlik və milli qürur ideyaları gələcək nəsillərə ötürülməlidir.

Bayrağımız qürurumuz, müstəqilliyimiz və milli birliyimizin əbədi rəmzidir!

Emil Əkbərov
"BİG Media"MMC-nin direktoru

Telegramda izləyin