"Qəhrəmanların bir Vətəni, bir də bayraq sarılmış tabutu olur"

Qəhrəmanların bir Vətəni, bir də bayraq sarılmış tabutu olur.

Azərbaycan! Bu doğma adı eşidəndə qürurlanıram, fərəhlənirəm, eyni zamanda beynimi iki sual narahat edir.

Birincisi, niyə dünyada azərbaycanlılar və türklər qədər Vətənini canından çox sevən üçüncü bir millət yoxdur?

İkincisi, niyə kasıb ailələrdə boya-başa çatan insanlar varlı ailələrdə böyüyən insanlardan daha çox sevir Vətənini?

Bu suallara hər kəs fərqli-fərqli cavablar verə bilər. Mən bu sualın cavabını işimlə bağlı rayona gedərkən, yol kənarında, şəraitsiz yerdə, soyuq havada qutab bişirib satan iki ağbirçək ananın ailəsini, balalarını dolandırmaq üçün min bir əzab əziyyətə qatlanmasını görüncə tapdım.

Bizə Vətəni sevdirən zəhmətkes, qayğıkeş, qeyrətli, namuslu analarımızın verdiyi tərbiyədir. Övladlarını əzab-əziyyətlə böyütməyidir. Əziyyət görməyən, var-dövlət içində yaşayan insanlar Vətən qədrini onlar qədər bilməzlər. Çünki kasıbın gedəcək başqa məmləkəti yoxdur. Ölsə də, qalsa da, torpağına bağlıdır.

Buna canlı sübut 44 günlük Vətən müharibəsində və hazırda Qabağımızda Vətənin müdafiəsi üçün canından keçən, min bir əzab-əziyyətlə boya-başa çatan igid qəhrəmanlarımızdır, böyük əksəriyyəti kasıb ailələrdə böyüyən oğullardır. Şəhid tabutu uzərində boynu bükük, gözü yaşlı, dik durmağa çalışan kasıb analar və atalardır.

30 il ərzində kimsə görüb ki, hansısa varlı ailənin oğlu Azərbaycanın şanlı bayragi ilə üzlənmiş tabutda gəlsin evinə? Heç arzulamıram da. Bilirəm, bu dediklərim çox adamın xoşuna gəlməyəcək, amma reallıq budur.

Allah bütün Azərbaycan, türk balalarını qorusun, fərqi yoxdur, varlı balası, kasıb balası - hamsı bizimdir, amma Vətəni sevmək lazımdır, Vətən üçün candan keçməyə hazır olmaq lazimdır, çünki bura bizim Vətəndir, Vətən ana deməkdir! Başqa anamız olmadığı kimi, başqa Vətənimiz olmayacaq! Olsa da, ögey olacaq...

Tural Qoca

Telegramda izləyin