"Bir körpəni məhv edənlərin Allah bəlalarını versin!" - Kəmalə Ağazədə

Xəbər verdiyimiz kimi, fevralın 4-də, Bakının Xəzər rayonu, Binə qəsəbəsi sakini 06 may 2006-cı il təvəllüdlü Nigar Rüstəmova (ad və soyad şərtidir) və bətnindəki döl ölüb. 15 yaşlı qız saat 14 radələrində yaşadığı ünvanda ev şəraitində ölü döl doğduqdan sonra halının pisləşərək komatoz vəziyyətə düşməsi səbəbindən 3 saylı Şəhər Kliniki Xəstəxanasına gətirilib və saat 18 radələrində xəstəxananın reanimasiya şöbəsində ölüb. Mərhumun 10 ay əvvəl 1993-cü il təvəllüdlü Elvin Məmmədov (ad və soyad şərtidir) ilə ailə həyatı qurduğu deyilir.

21-ci əsrdə yaşasaq da, bəzi "valideyn"lər sanki hələ də bu əsrə öyrəşməyiblər. Bəs bu gün erkən nigahın qarşısını almaq üçün hansı addımlar atılmalıdır?

Məsələ ilə bağlı Sonxeber.az-a Azərbaycan Uşaqlar Birliyinin sədri Kəmalə Ağazadə açıqlama verib.

O, hesab edir ki, 15 yaşında qızın dünyaya uşaq gətirməsinin özü bir, ölümü ikinci faciədir.

"Nə deyim? Burada artıq cahillik məsələsi deyil. Bu, ədəbsizlik, tərbiyəsizlik, əxlaqsızlıqdır. Bununla pedofil nəsil böyüdürük. Pedofil ailələr formalaşır.

Mütləq qaydada qanunvericilikdə sərt qərarlar qoyulmalı, cəza mexanizmləri formalaşmalıdır. Əgər bir neçə ailə nümunə olaraq cəzalandırılarsa, həbsə göndərilsə, inanın ki, "göbək kəsti", "söz aldı" nişanlılıq olmayacaq.

Yəni burada yalnız qanunların sərtləşdirilməsi və bu sərtləşdirilmə mexanizminə də ciddi nəzarət lazımdır. Bəlkə, o zaman bu "dəyər"lərdən uzaqlaşarlar. Bir körpəni məhv edənlərin Allah bəlalarını versin".

ZAİRA AKİFQIZI

Telegramda izləyin