"Su çənimizi yığışdırdılar ki, şəhərin gözəlliyini pozur..." - Daha bir SU PROBLEMİ - ŞİKAYƏT - AÇIQLAMA

Sonxeber.az-ın redaksiyasına su ilə bağlı növbəti şikayət daxil olub.

Belə ki, Təhminə Babayeva adlı şikayətçinin sözlərinə görə, Nizami rayonu "Naxçıvanski" 94B ünvanında gündüz saat 11-də suyu azalda-azalda tam kəsirlər, axşamüstü 6, 7-də yenidən açırlar:

"Gecə 12-yə işləmiş isə yenə kəsirlər, gecə də su gəlmir. Nizami Rayon Sukanal İdarəsi telefonlara cavab vermir. "Azərsu"nun qaynar xəttindən isə deyilir ki, su ehtiyat anbarlarından verildiyinə görə azaldılıb.

Bakıda bizə su ancaq ehtiyat anbarından verilir? 2 il öncə su çənimizi gəlib yığışdırdılar ki, şəhərin gözəlliyini pozur. Amma belə gözəl şəhərdəki binanın evlərinin ayaqyolusu səhərdən axşama kimi susuz qalır, iyrənclik olur. Körpə uşaqlıyam, necə yaşayaq? Biz 9-cu mərtəbədə yaşayırıq, suyun təzyiqi o qədər aşağı verilir ki, veriləndə də "pyatiminutka" açmır, isti su olmur, paltaryuyan maşın suyu götürə bilmir".

Məsələ ilə bağlı "Azərsu" ASC-nin mətbuat xidmətinin rəhbəri Anar Cəbrayıllı ilə əlaqə saxladıq.

Anar bəy problemi araşdırdıqdan sonra bildirdi ki, payıza doğru bu məsələ öz həllini tapacaq:

"Hazırda bu binanın qrafiki belədir: səhər 06:00-dan 12:00-a qədər nasoslarla su təzyiqlə vurulur. Daha sonra 12:00-dan axşam saat 18:00-a kimi su artıq öz axımı rejimində verilir. Axşam 18:00-dan, gecə 00:00-a kimi isə yenidən nasoslarla suyun vurulması təmin olunur. Gecə 00:00-dan isə yenidən öz axımı ilə verilir.

Amma payız rejiminə keçilməsi ilə əlaqədar artıq anbarlarda kifayət qədər su ehtiyatı yaranacaq, həmin ərazidəki gündüz və gecə saatlarındakı təzyiq məsələsi öz həllini tapacaq.

Yay aylarında biz anbar ehtiyatlarını toplayıb insanların daimi su tapması məqsədi ilə gündüz və gecə saatlarında bəzi ərazilərdə anbarlardan suyun verilişini azaldırıq və yaxud da tam kəsirik ki, anbar ehtiyatlarımız toplansın. Bu, ən çox iyun, iyul, avqust aylarında baş verir. Yayda tələbat kəskin artır, bu il isə, bildiyiniz kimi, çox isti keçdi. Amma artıq payıza doğru məsələ öz həllini tapacaq".

Aysel Səfərzadə

Telegramda izləyin