Pekin Olimpiadasında QALMAQAL: İdmançılar göz yaşı içində

Pekin Qış Olimpiya Oyunlarına gedən idmançılar oradakı şəraiti gördükdən sonra sosial şəbəkədə şikayətlərini yaymağa başladılar.

Sonxeber.az xarici mətbuata istinadən xəbər verir ki, idmançılar düşərgələrdəki yerləşmə şəraitindən, verilən yeməklərdən, təcridxanalardan və hava şəraitindən şikayətlənirlər.

Onlar menyuda isti yeməklərin olmadığını, bir az çips, bir az qoz-fındıq və şokolad verildiyini bildiriblər. ABŞ komandasının nümayəndələri isə tədarük görərək, özləri ilə makaron paketləri aparıblar.

Hər kəsin yekdil fikrinə görə, yarışlar zamanı idmançıların sığınacaq və qida ehtiyacları Pekində ödənilə bilməsə də, lazımsız yerə sərtləşdirilmiş koronavirus tədbirləri Olimpiadaya qatılan hər kəsin həyatını "cəhənnəmə" çevirib.

Beynəlxalq Olimpiya Komitəsi mövzu ilə bağlı açıqlamasında bunları bildirib:

"Bəzi idmançıların səsləndirdiyi şikayətlərdən xəbərdarıq. Vəziyyət Pekin Olimpiya Komitəsinə çatdırılıb və həll yolu tapılacaq. Koronavirusa görə yarışa bilməyən idmançıların kədərini bölüşürük, lakin bütün bu tədbirlər Olimpiadanın hamı üçün təhlükəsiz keçməsi niyyəti ilə həyata keçirilir".

Pekində idmançıların vəziyyətini ağırlaşdıran digər amil isə sərt hava şəraiti olub. Küləyin təsiri ilə bəzi hallarda havanın temperaturu -35 dərəcəyə qədər düşüb. Bəzi idmançılar bu səbəbdən zədələnib və yarışları yarıda tərk etməli olub.

Aygün Osmanlı

Telegramda izləyin