"Paşinyan artıq Zəngəzur dəhlizi ilə bağlı pozitiv mövqeyini ortaya qoymağa başlayıb"-AÇIQLAMA

"Azərbayacan Respublikasının Prezidenti Cənab İlham Əliyevin Rusiyaya rəsmi səfəri başlayıb. Bu səfər çərçivəsində ikitərəfli münasibətlərimizin müttəfiqlik səviyyəsinə qaldırılmasını özündə ehtiva edən çox mühüm bir sənəd imzalanacaq".

Bu sözləri Sonxeber.az-a açıqlamasında deputat Elman Nəsirov deyib.

O bildirib ki, müttəfiqlik münasibətləri ilə bağlı olan bu sənədin imzalanması ilə bizim strateji tərəfdaşlıq münasibətlərimiz ən yüksək mərhələyə daxil olacaq:

"Bu sənəddə iqdisadi, ticari, siyasi, humanitar və bütün digər sferalarda əlaqələrin bundan sonrakı inkişafına dair məsələlərin öz əksini tapacağı gözlənilir. Həmin sənəd Azərbaycan-Rusiya münasibətlərinin bundan sonrakı mərhələ üçün bir yol xəritəsi də hesab oluna bilər.

Əvvala qeyd edim ki, Azərbaycan-Rusiya münasibətləri dinamik inkişaf tempinə malikdir. Siyasi sahədə əlaqələr çox yüksək sürətlə inkişaf edir. Ötən il Azərbaycan və Rusiya prezidentləri bir neçə ay ərzində iki dəfə görüş keçiriblər. Bu görüş noyabrın 26-da Soçidə, dekabrn 28-də isə Sankt-Peterburq şəhərində keçirilib. Eyni zamanda, çoxsaylı telefon danışıqları olub. Sonuncu dəfə İlham Əliyev bu ilin yanvar ayının 18-də Rusiya prezideti ilə telefonda danışıb. Bu, cənab İlham Əliyevin Ukrayna səfərinin ardınca baş vermiş bir danışıqdır.

Göründüyü kimi, siyasi sahədə əlaqələr sürətlə inkişaf edir. Siyasi dialoq kifayət qədər güclüdür.

Bütün fundamental məsələlərdə Azərbaycan-Rusiya mövqeyi üst-üstə düşür. Hər iki ölkə üçün əhəmiyyətli olan, Qarabağın vəziyyətinin tənzimlənməsi ilə bağlı məsələlərdə də Rusiya Azərbaycanın yaxın tərəfdaşıdır.

Bizim iqdisadi-siyasi əlaqələrimiz də sürətlə inkişaf edir. Pandemiya dövrü müəyyən çətinliklər yaratsa da, Azərbaycan və Rusiya bir-birinin bu sahədə də ən yaxın tərəfdaşlarından biridir.

İki ölkə arasında, həmçinin, humanitar sahədə əlaqələr inkişaf edir. Tez-tez forumlar keçirilir, regionlararası forumları xüsusilə qeyd etmək istərdim.

İmzalanacaq sənəd heç bir halda üçüncü tərəfə qarşı yönəlməyib. Bu sənəd regionda davamlı, uzunmüddətli sülhün və təhlükəsizliyin formalaşmasına xidmət edən sənəddir və onun imzalanması ilə Ermənistanda müəyyən revanşist qüvvələrin "iştahası kəsilmiş" olur. Onlar bu gün "bəlkə də, qaytardılar" xülyası ilə yaşayırlar. Amma Azərbaycan-Rusiya münasibətlərinin müttəfiqlik səviyyəsinə yüksəlməsi eyni zamanda onların da iddialarının qarşısına bir səddir.

Yeri gəlmişkən, postmüharibə, postmünaqişə dövründə həllini gözləyən məsələlərin tənzimlənməsi üçün də müttəfiqlik münasibətləri ilə bağlı imzalanacaq bu bəyənnamənin mühüm rolu ola bilər.

İlk növbədə, bəyannamə Azərbaycanla Ermənistan arasında sərhədlərin delimitasiya və demarkasiyası, iki dövlət arasında nəqliyyat komunikasiya xətlərinin bərpası və Zəngəzur dəhlizinin işə salınması, iki dövlət arasında etimad mühitinin formalaşması ilə bağlı məsələlərin həlli və nəhayət Azərbaycan və Ermənistan arasında gözlənilən sülh sazişinin imzalanması üçün münbit şərait yarada bilər.

Təsadüfi deyil ki, Nikol Paşinyan artıq Zəngəzur dəhlizi ilə bağlı çox pozitiv mövqeyini ortaya qoymağa başlayıb. Hesab edirəm ki, imzalanan sənəd bu istiqamətdə də həllini gözləyən bir sıra məsələlərin daha tez tənzimlənməsi üçün əlverişli şəraiti yaradacaq".

ZAİRA AKİFQIZI

Telegramda izləyin