Novruz gəlir, yaz gəlir - KİM HARADA DİNCƏLİR? - QİYMƏTLƏR

Novruz bayramına artıq sayılı günlər qalıb. Bakı əhalisi bayram tətilindən istifadə edərək şəhərin tıxaclarından və yorucu qələbəliyindən, bir neçə günlük də olsa, uzaq qalmaq, istirahət etmək üçün rayonlara üz tutmağa başlayacaq. Bayramla əlaqədar istirahət günlərinin sayının çox olması buna əsl şərait yaradır. Xüsusilə, istirahət mərkəzlərində Novruz şənliklərinin keçirilməsi vətəndaşların marağını cəlb edir. Bəs bayram ərəfəsində istirahət mərkəzlərində qiymətlər necədir?

Sonxeber.az-ın sorğusunu cavablandıran "Ebrou travel" turizm şirkətinin direktoru Sürəyya Axundova bildirib ki, Novruz bayramı ilə əlaqədar müxtəlif istirahət mərkəzlərində qiymətlər dəyişir.

Belə ki, onun sözlərinə görə, Azərbaycan daxilində, cənub bölgəsində 2 nəfərlik 1 otaq 120 azn-dən başlanır. Bura səhər yeməyi daxildir.
5 ulduzlu oteldə isə, məsələn, "Lənkəran Spring"də 3 dəfə qidalanma ilə 2 nəfərlik qiymətlər 295 manatdan başlayır.
Quba-Qusar bölgəsində də oteldə bir gecə qalmağın qiyməti 110 manatdan başlayır.

"Qafqaz Tufandag Mountain Resort Hotel" – burada bir gecəlik iki nəfər üçün "deluxe" otağın (səhər yeməyi də daxil olmaqla) qiyməti 275 AZN-dir .

Qəbələ şəhərinin otellərindən biri olan "Qafqaz Resort Otel"ində 20-21 mart tarixində, səhər yeməyi daxil olmaqla, 1 gecəlik standart otaq 155 AZN-dir.

Xarici turlarla bağlı isə, ən çox istiqamət Türkiyənin İstanbul şəhərinədir. Mİnimum qiymət 800 dollardan başlayır.

Novruz tətilində Dubay tur paketinin qiyməti iki nəfər üçün 1400 dollardan başlayır. Bu məbləğə aviabilet, transfer, sığorta, viza və səhər yeməyi daxildir.

Azərbaycanlı turistlərin getdiyi istiqamətlərdən biri də Misirin Şarm əş-Şeyx kurort şəhəridir. Şarm əş-Şeyxə Bakıdan birbaşa reyslər açılıb və 19 Mart tarixinə olan birinci reys tamamilə dolub. Bu turun qiyməti, hər şey daxil, iki nəfərlik 1200 dollardan başlayır. Qeyd edək ki, Şarm əş-Şeyx və İstanbula bütün yerlər doludur və satış dayandırılıb. Dubaya isə qiymətlər aktivdir.

Aygün Osmanlı

Telegramda izləyin